Saturday, June 28, 2008

ارحل بهدوء




كنت حينها اجرى مسرعة بشكل جنونى بينما تتقطع انفاسى وتتمزق ولم اعد قادرة على التنفس

كان شكله مريعا وكنت اهرب حتى من النظر اليه
ولا اعرف من هو فلم اره من قبل
لم يكن لدى خيار سوى الاختباء

ولم اجد سوى الشرفة

فاختبئت بها


اذا به يقذفنى منها


ظللت اتشبث بحبال تتقطع واحد تلو الاخر حتى صرت على وشك السقوط


وفجأة


ظهر هو


ومد يده


والتقطنى


وظللت اصعد واصعد


كانت عيناى متعلقة به هو بغض النظر عما كنت فيه قبل قليل



انت جيت يا بابا ؟


اطلعى الاول بس


متمشيش تانى بقى


يا بنتى اطلعى الاول


طيب انت هاتمشى؟


ويختفى ابى مرة اخرى بعد ان ينقذنى


اهرع لابحث عنه فى كل مكان فلا اجد سوى اشواك تدمينى وانا اصرخ لانادى عليه ولا اشعر بألم


فقط ارى دمى ينزف


واخيرا اجده واقفا حزينا ينادى على ولا استطيع الوصول اليه


فاسقط من جديد


واصرخ




اعوذ بالله من الشيظان الرجيم مالك يا بنتى فيكى ايه ايه حكاية الكوابيس اللى يوماتى دى



وتناولنى كوبا من الماء وتحتضننى


مش عايزة اشرب


انتى مش بتكلى خالص عشان نقول اتعشيتى ونمتى فبجيلك كوابيس


انا شفت بابا


الله يرحمه


عايزة انام


قومى يا بنتى اقعدى كفاية نوم وكوابيس


عايزة انام



وافكر


ربما صرت اراه حزينا عاجزا عن مساعدتى لاننى الآن هكذا


تتكاثر المشكلات وينعدم الشعور بالأمان بكل اشكاله وصوره ونصبح فى حاجة الى العون او ربما معجزة تنتشلنا من ما صرنا موحلون به فى دنيا لا تعلم الا لغة واحدة


القوة


فان لم تكن على مستوى الحدث فلا داعى لوجودك


فقد


ارحل


ارحل بهدوء


28 comments:

abo salah said...

بعد السلام عليكم

رغم حزن كلماتك
والأسى التى تحمله

الا أننى شعرت بصدقك ومعاناتك

أسال الله لك أن يرزقك الخير والصبر

وليرحم الله أباءنا جميعا

فعلا الفراق حاجة صعبة أوى
خاصة لو فراق حد انت مش شايف الدنيا تنفع من غيره

تحياتي ليكي
وأن شاء الله ارجع المرة الجاية على بوست كله تفاؤل
وربنا يسعدك

Anonymous said...

اسلوبك رائع على فكرة
تسلسل الفكرة عندك بيعمل فى القارىء زى التنويم المغناطيسى بحيث ان اخر كلمة تخلى القارىء وصل لمرحلة من التسليم التام للى بتقوليه
انا شخصيا باشوف ان دا كل اللى انتى محتاجاه عشان تكونى فى مصاف الكتاب المشهورين
استمرى
وحاولى تنشرى شغلك
خسارة نخسر كاتبة موهوبة فى نظرى ما هاتقل عن اى حد موجود او كان موجود

عمر فوزى
صحفى بالاهرام
oumer_f@yahoo.com

عايش... ولكن !!!! said...

اولا الله يرحم والدك
ويرحم ابائنا جميعا

بخصوص البوست احنا حياتنا بقت عباره عن كابوس وقليل جدا لما نلاقى حد فرحان
وبجد بدأت امل من البوستات الحزينه الكتيييير اللى كل ما ادخل مدونه الاقيها
بس للاسف كل واحد بيعبر عن اللى جواه وكلنا بقينا مقهورين

بس بجد اسلوبك وتسلسلك فى سرد البوست رائع
بجد احييكى عليه


علاء

blue-wave said...

لماذا كل هذا الحزن؟
لماذا؟

الفارس الملثم said...

مش عارف اقولك ايه يا شهد

انتي يمكن تعرفي علي الاقل من خلال كتاباتي اني غارق في الحزن حتي الثماله ..

لكن اكيد عندي اسبابي القويه اللي خارجه عن ارادتي ...

بس انا شايف انك انتي عملتي دايره مغلقه من الحزن والالم وحبستي نفسك جواها ..

ربنا يرحم والدك بس هو اكيد ايتالم اكتر لما يحس انك غارقه في الحزن كده

ياريت ميكنش كلامي ضايقك بس حقيقي البوست ده وجعني اوي لاني حسيت بالم ووجعك ما بين السطور

تحياتي دائما
محمد

Empress appy said...

بجد انتى هايله
ربنا يرحمه برحمته يا رب وعموما رؤيه الوالد خير صدقينى وان شاء الله تلاقى خير كتير

سنووايت said...

جميل اسلوبك
بس مش جميل الاحساس اللي انتي حاساه :(
احيانا بنفتقد الامان لما بنفقد اللي كانوا بيمثلوه لينا لكن يكفي ذكراهم اللي جوة قلوبنا
ربنا يرحمه ويلهمك الصبر والقوة

Anonymous said...

طظ فى اى حاجة
عيشى حياتك وسيبك من الكوابيس
انتى متستاهليش كدة

!!! عارفة ... مش عارف ليه said...

شوفي
يمكن يكون اللي راح هو كل حاجة إنما الدنيا مبتوقفش والحمد لله
في بنوتة هايلة موجدة اهي وشايلة اسمه
وبتخلد زكراه بكلامها الجميل دا
واكيد هو فرحان بيكي دلوقت إن شاء الله
واكيد في ناس كتير بيحبوكي حواليكي قربي منهم اووووي
وكمان اقري كتير كتير كتيررر
على اد ما تقدري
اقتلي وقتك في القراية
واستمتعي بحياتك
وإن شاء الله
بكرة أحسن من النهاردة

تحياتي

موناليزا said...

ياه
قد ايه موجعة وقاسية
كلماتك راقية واسلوبك منمق
بالتوفيق دائما

HANY YASSIN said...

السلام عليكم
قصة جميلة
رغم زيادة جرعة الآلام بها
اجمل ما فى كلماتك التشويق الذى يجعل القارئ ينتظر النهاية
خالص التحية لك
هانى يس

إنتظارات شاهقة said...

فان لم تكن على مستوى الحدث فلا داعى لوجودك
فقد
ارحل
ارحل بهدوء
قاسية قوى قوى الكلمات دى
فمن منا لا يشتاق لمن فقدهم
وظهورهم فى منامنا لحظات يخفف عنا الكثير
فهونى عليك
الدنيا فيها حزن وفرح كثير
ولا تردى ابدا من يظهروا فى حياتك حتى لو كان وجودهم مظهرى
دومت بسعادة

عدنان أحمد said...

السلام عليكم

الموضوع دة شدني جدا لأني عانيت منه شخصيا
رحم الله والدك و والدي و موتى المسلمين جميعا

ولا اخفي اعجابي بمدونتك
فتقبلي مروري البسيط

تحياتي
عدنان

سارة علي said...

واظل ابحث عن المخرج من حلمى الوحيد اركض واركض خارج ضفائر حزنى البعيد فلا الضفائر تركتنى ارحل ولا الفرح اتانى من جديد
احساس عالى وربنا معاكى فى محنتك
تقبلى مرورى

ظل الشمس said...

abo salah

شكرا على المرور الرقيق
بجد نورت
وربنا يفرج كروب الناس كلها

ظل الشمس said...

anonymous

مرور حضرتك وكلامك يشرفنى جدا
ويارب دايما عند احسن الظن

ظل الشمس said...

عايش ولكن

نورت بجد
وفعلا واضح انها حالة حزن عامة ماشية فىا لبلد
ربنا يكرم الكل ويصبرهم

ظل الشمس said...

blue-wave


لان الدنيا كدا
نورت :)

ظل الشمس said...

الفارس الملثم
ازيك يا محمد عامل ايه يار بتكون بخير
كلامك طبعا مش دايقنى بالعكس
انت صح
لكن ساعات بنحص ان الدنيا بقت مش فيها حاجة تستاهل نصبر عشانها
وساعات بنبقى صامدين
نورتنى ويارب دايما

ظل الشمس said...

appy

انتى اللى هايلة جدا
ربنا يخليكى
نورتينى
ربنا يكرمك

ظل الشمس said...

سنووايت
ربنا يكرمك على الدعاء
نورتينى :)

ظل الشمس said...

anonyomous
فيه حاجات مش بنفع نقولها toz

ظل الشمس said...

عارفة..مش عارف ليه!!!

بجد كلامك صح جدا
وبنحاول نتأقلم
بس الظاهر فترة التأقلم طولت شوية
نورت بجد
ويارب دايما منور

ظل الشمس said...

موناليزا
كرا جدا على الاطارء وقبلهم المرور
حقيقى باشكرك

ظل الشمس said...

hany yassine

رؤية نقدية لمشاعرى اسعدتنى جدا وادتنى امل فى انى اكمل كتابة
نورت بجد :)

ظل الشمس said...

احلام اليقظة
عندك حق فعلا
الظاهر انها مشكلة اى حد بيحس بوحدة
نورتى بجد

ظل الشمس said...

اسير حبيبتى

مرورك اسعدنى جدا
يارب دايما منورنى
وربنا يصبرنا كلنا

ظل الشمس said...

سارة على
كلماتك جميلة جدا
نورتى بجد
ويارب دايما منورانى