سيبى الفستان هيتكرمش من كتر ما بتلعبى بيه"
هو عيل بتهشتكيه؟
"ما انتى عندك فساتين كتير انتى كل فستان عيد هتقعد تملسي عليه كدا؟
دا كان كلام الحاجة امى وانا عندى 11 سنة
كانت ليلة العيد وعمالة احاول انام بالعافية
وكل ما اغمض عينى اشوف نفسى لابسة فستان العيد والجزمة وشعرى اللى ماما مالياه شرايط ملونة ومتعلقة ف ايد بابا وعمال اتنطط يمين وشمال وهو يشدنى من ايدى ويقولى اركزى بقى عشان نلحق الصلاة
صلاة العيد والزينة والعيال اللى مسيتنة الصلاة تخلص عشان نشترى اللعب ونلعب بيها
بصوا بقى
بكرة العيد
تلاتين ستة
تلاتين يونيو
صدقونى
انا كل ما اشوف العلم احس بنفس احساسى ناحية فستان العيد
مش عارفة انام
كل ما اغمض عينى اشوف المسيرة اللى انا ف وسطها بين ناس ثايرة وحرة
وصوت رفضهم للعبودية واصل للسما
المسيرة اللى مالهاش اول من اخر الكل فيها بيمارس اهم طقس وطنى ف الكون
متظاهرين مالهومش اول من اخر
كل واحد فيهم قلبه عليك زى ما انت قلبك على كل واحد فيهم
لحظة وصول المسيرة للميدان واجمل طقس تنظيمى غير منظم بيحصل:)
ايوة تنظيمى و غير منظم
زى ما قريت كدهون
كلنا عارفين اننا لازم ناخد اماكنا ف الميدان
ويستقبلنا المسيرة اللى وصلت قبلنا
واحنا نستنى المسيرات اللى هتوصل بعدنا
ده غيرالهتاف
ايوة الهتاف
حريتنا اللى رايحين ناخدها بالقوة
الشهدا اللى شايفنا حاطينا اكفانا على ايدينا وطالعين بالملايين نجيبلهم حقهم
ونظرة الرضا اللى بنتخيل انهم بيبصوهالنا ساعتها
ودى لوحدها عيد
بلدى حبيبتى
انتى قسيتى عليا كتير
واحبطتينى كتير
بس ولا يهمك
براحتك :)
انتى تعملى اللى تعمليه
وبردو هنشيلك فوق راسنا
بصى
انا قالولى العيد فستان وكحكاية وجزمة جديدة بتلمع
بس العيد يوم ما ولادك يقرروا يرموا الظلم تحت رجليهم ويرجعوكى معززة مكرمة
وعلى فكرة
قالولى العيد بيت متنفض وسجاجيد مغسولة
وانا اكتشتف جوا منى ان العيد لما انتى تتحررى من كل اللى وسخوا علمك وارضك وسيحوا دم عيالك
بصى بقى :)
انا لو ليا مكان تانى غير هنا انا بردو نازلة احررك انا وكل اللى بيحبوكى
كلنا نازلين نشيل الهم اللى كابس على قلبك وروحك
شوارعك هتنور
وبناتك هتبقى ف امان
وولادك هنشيل من قلبهم الاحباط وخيبة الامل وكسرة النفس
انتى العروسة بكرة
وكلنا هنحضر يوم فرحك بنصرك وحريتك
وحريتنا
ونصرنا
العيد بكرة يا بهية
العيد ف عيونك انتى
