Thursday, June 27, 2013

انا بدى اروح بلدى

يا عزيز عينى
انا بدى اروح بلدى
اما روحت بقى
 لاقيتها مخطوفة
لاقيتها مضلمة ومنكادة
اكمن النور كان مقطوع
واللى ماسك السكينة جربوع
والريس بيقول انه قابض 
حتى القاضى فاسد
اللى مكيشه فلان الفلانى
عشان يكسب الانتخابات
بس انا مفهمتش
ولا استوعبتش
انا كل اللى كان قصدى
اروح بلدى
 
انا اللى روحت امدلك ايدى يا بلدى
لاقتهم بيدَعوا عليا
انى فلول
ومتسلطة
قابضة من حسنى وجمال وشفيق وامريكا
عربيتك وبيتك ونور الصالة المنقاد
كلهم رشاوى وعمولات
مع ان تانك البنزين
مصفر عداد
وانا يا عالم مكانش قصدى
غير انى بدى اروح بلدى
 
انتى مش كريمة العنصرين
انتى اصلك عربى وجاسوسة
الفراعنة منا واحنا منهم
كانوا كفار وعبيد ولازم نحتقرهم
احنا معانا الدقن المدروسة
طيب
يا اهل الله من امتى بدى افهم
كان الوطن شجرة عيلة وكلام بطايق
وسجل مدنى فيه الجنسية خانة مصايب
مع انى هنا وعشان هنا
واخرها بردو هيلمنى التراب هنا
جواز سفرى خانة الجنسية فيه مصرية
متأخرة عنكم بس زيكم موطية
لاى ريح تدفى البرد الممرمط ف اهالينا
ودايس على احلامنا وبيموتها فينا
انا هى انا 
نسيوتنى؟
انا بدى اروح بلدى

ورضيت بالتكدير
وقفت ف الطابور لاجل ماخد كام لتر بنزين
واستنيت التباع لاجل مل يكمل العربية
 ودفعت الاجرة زيادة جنيهين
النور قطع عليا والمية شحت وطابور الشهر العقارى طويل
والموظف على رقبته الف طوق وسلسلة
بيجره اكل العيش جر
قالى يا بنتى التوكيلات هنا بالامر
تفويض السلطة لاكل العيش
يا حاج انا مش جاية اوكل حاكم
ولا اديلة شرعية على طول ولا بالورب
انا رحت اقول انا موكلاك يارب
من غير ورق ولا عناوين
ولا دفاتر ولا دواوين
ممكن يا حاج تخلصلى الورقة من غير حق الشاى
اصل التباع خد منى اخر جنينهين فكة
والمواصلات صعبة
وانا بلدى بعيدة
وبدى اروح بلدى