Monday, April 7, 2008

وسقط القناع..part 2

الاخوان هايشاركوا فى انتخابات المحليات
طب ادينى عقلك بقى
الاخوان ميشتركوش فى الاعتصام وفى نفس الوقت وبالصدفة البحتة سبحان الله يشتركوا فى المحليات بعد صراعهم الطويل مع الحكومة فى الموضوع دا
كدا بقينا الحمد لله فاهمين ايه اللى بيحصل
مش هانسأل تانى ازاى ينتفضوا عشان غزة ويحشدوا قواتهم ومينتفضوش عشان مصر
كل الحكاية انهم كانوا بيقولوا للحكومة دى عينة من اللى هايحصل لو اشتركنا فى اى اضراب
وطبعا الحكومة مكدبتش خبر فاوضتهم على الكراسى اللى هما عايزينها ومش بيعوزوا غيرها وطبعا هما وافقوا وادوا اوردر ان مفيش حد اخوانى هايعتصم
الكارثة بقى ان الاخوان وشباب الاخوان اللى بيقولوا انهم على قدر من النضج والعقلانية عدى دا على عقولهم النابغة ومعلقوش وقالوا سمعا وطاعة كالعادة
اتفاقات شراكة مع الحكومة ولعب تحت الترابيزة وكل دا وعادى المهم كرسى المجلس حتى لو مجلس محلى
ماهو الحكاية مع الحكومة بقت تبادل مصالح ونظام شد وارخى واللى يتجوز امى اقوله يا عمى على رأى المثل المصرى المشهور
وزى ما قلت قبل كدا ان مش هايكون فيه ذرة ثقة فى الاخوان او غيرهم لانهم ميفرقوش حاجة عن اى فاسد او صاحب ذمة خربه
فببساطة يا سادة كرسى فى مجلس محلى عند الاخوان اغلى واهم واقيّم من رغيف عيش لابو العيال المطحون او غطى لعيلة بتموت من البرد بس ازاى تدفى وهى بتتقطع بين حكومة فاسدة ومعارضة اكثر فسادا
للمرة التانية باسحب اى احترام كان ليهم فى يوم من الايام لانهم لا يستحقوه
وسلملى بقى على القوة الوطنية الحاشدة لمواجهة الفساد والاستبداد

4 comments:

Medo said...

بالمناسبه يا ريت الاخوان هيشاركو فى المحليات..دول طلعوا كمان النهارده على لسان المرشد العام وقال لا يا جماعه..جماعة الاخوان طبعا..مش لاعبين
امال منين جبت لينا الغم فى البلد بين شد وجذب بينك وبين الحكومه ودلوقتىتقول مش لاعب
وفين دعوتك للتحالف مع الاقباط
بصراحه انا مش فاهم لسه حل اللغز
انتى فاهمه؟

موناليزا said...

انا مش عارفه اقول ايه بس لازم حد فيهم يطلع ويدافع عنهم ويقول بجد ايه السبب

CrY2DaY said...

اكيد السبب اما خـــــوف من اية بقى مش عارف تهديد مثلا ضغط بردة مش قادر افهم اية القصة دى
بس بالنسبة لان الاخوان لم يشاركوا فى الاضراب دى وجهة نظر وانا اعرف ناس كتير من عامة الشعب ضد افكار الحكومة ونظامها ومع ذلك لم يشاركوا فى الاضراب وانا كنت واحد منهم لم اشارك فى الاضراب ولكنى سوف اشارك فية يوم 4/5 بإذن الله


تحياتى

Hosam said...

صراحة بعد ما الانتخابات المحليات خلصت واصدرت الاحكام العسكرية ضد الاخوان الكلام ده طلع مش مظبوط ولا فى صفقة ولا فى بطيخ