Sunday, April 6, 2008

وسقط القناع

النهاردة مصر كانت ناوية تضرب وبعدين رجعت فى كلامها
او بالاحرى طبقت مبدأ من خاف سلم
مش عارفة اوصف اللى حصل النهاردة بالظبط
يمكن هاعرف اوصفه بعدين لما اجى احكيه لاولادى ,بس كل اللى اعرفه ان النهاردة كان يوم بجد مختلف وفيه مفاجآت كبيرة جدا
النهاردة يا جماعة صحينا على هدوء نسبى فى الشوارع
المدارس فاضية ودا لان الاهالى خافوا على اولادهم
الجامعات شرحه الا اللى كان عندهم امتحانات
المواصلات بشكل عام كانت قليلة والحكومة بذات نفسها ممثلة فى شرطة المرور هى اللى كانت بتجبر اصحاب الميكروباص على انهم يركبوا الناس ويودوهم ودا شافته صحبيتى وهى رايحة الميد تيرم بتاعها فى ميدان ا لساعة فى اسكندرية
كمان حصل وقائع تكسير محلات فى اماكن كتير ودا طبعا مش غريب لان الناس من غير اضراب او غيره الاسعار وضيق الحال خلاها مشكوك فى قواها العقلية للاسف
الشوارع كانت فاضية نسبيا بس البيع والشرا كان عادى بعد الظهر مع ان الاضراب عموما كان معمول عن البيع والشرا
طبعا المصالح الحكومية كلها كانت كامل العدد النهاردة ودا بسبب ان الحكومة هددت الموظفين بسلخ جلدهم عن عضمهم فى حال غيابهم
باختصار اليوم النهاردة كان شبه اجازة لفئات معينة والعاصفة الترابية استخدمتها المعارضة عشان ترمى عليها فشل الاضراب بالكامل واستخدمتهاا لحكومة عشان تبرر غياب الطلبة
اليوم عدى بسلام وجه عكس كل التوقعات
المفاجأة النهاردة كانت فى موقف الاخوان المسلمين
الاخوان موقفهم كان سلبى ولم يشاركوا فى اى اضراب اقصد طبعا الموقف الرسمى للاخوان
طبعا معروف للجميع ان الاخوان بيتميزوا بالتنظيم وحشد القوات وقت ما يحبوا ودا اخر حاجة كانت ظاهرة ايام مظاهرات التضامن مع غزة الايام اللى فاتت , الغريبة انهم محشدوش قواتهم تضامنا مع المصريين!
!!!!!!!! مش فاهمة ليه
كل اللى اعرفه انها هاتفضل وصمة عار فى جبينهم واظن بعد كدا اتعرف مين هما الاخوان وانهم مبيتحركوش خطوة ولا بيقولوا كلمة الا عشان مصلحة الاخوان وبس اما المصريين فنروح فى اقرب حفرة وندفن نفسنا فيها مش مهم المهم
المصلحة العليا للجماعة المبجلة
الغريب ان عصام العريان لما اتسأل على الجزيرة فى برنامج ما وراء الخبر قال انه متضامن مع الاضراب وانه يتعاطف معاه وان الجماعة سابت الخيار لافرادها بالمشاركة او عدمها
انا عن نفسى لو كان جوايا ذرة تعاطف مع الاخوان او قادتهم او حتى ذرة اعجاب بحماسهم فانا دلوقتى باسحبه وباقول
بعلو صوتى
"ان الاخوان والحزب الوطنى وجهان لعملة واحدة"
الاتنين معندهومش مانع يدوسوا علينا عشان مصلحتهم
الجميل فى كل دا ان مفيش 10 اخوان اتجمعوا وعملوا مظاهرة او اعتصام عشان اى حاجة واول كلمة بتتقال فى اى حوار معاهم افرجوا عن المعتقلين الاخوان فى السجون
ياريت الناس تفهم ان اى حد تم اعتقاله من الاخوان كان لصالح الجماعة وان انتماءه الاول والاخير للجماعة مش لمصر ولا المصريين
يعنى انتفضتوا عشان غزة وحصارها والتجويع اللى فيها وحصار المصريين الاقتصادى وتجويعهم وموتهم فى طو ابير العيش مهزكوش
اوك
اعرف صاحبك وعلم عليه
واظن مصر النهاردة علمت على ولادها اللى بجد
ولادها اللى هما لا اخوان ولا وطنى ولا تجمع ولا كفاية
ولادها اللى قعدوا فى البيت وكلهم امل ان قعادهم يغير اى حاجة ولو بسيطة
ولادها اللى احتاروا بين حكومة بتنهب قوتهم وتهدد امنهم ومش بيهمها غير امنها وامن حكمها وبين جبهة معارضة كل همها توصل لكرسى الحكم ويوم ما هاتوصل مش هاتكون اقل شراسة ولا خطر علينا من اللى موجودين دلوقتى
والله يا جماعة انا تعبت فعلا وحالتى قربت يبقى ميئوس منها
فعلا جالى اكتئاب من اللى حصل النهاردة ودا من الاحباط اللى حصل لكل حد كان متخيل ان النهاردة كن ممكن يكون بداية تغيير
فى كل الاحوال لينا ربنا
والحمد لله على كل حال

2 comments:

Medo said...

انا مش اخوانى ومش بحب الاخوان من اساسه بس انا مهتم بالأمور السياسيه فى البلد دى وعايز انبهك لحاجه صغيره ان الظاهر من السياسه بصفه عامه فى اى مكان او اى تنظيم مش بالضروره يكون هوه الأجنده الحقيقيه المطلوب تنفيذها من قبل السياسيين
بمعنى اخر ان انا ولا انتى مش عارفيين ايه خبايا ولا ما وراء الموضوع لأن احنا مش مطلعين على حاجات كتير سواء فى الحزب الوطنى او الأخوان المسلمون
انا اتكعبلت فى مدونتك بالصدفه وعجبتنى
تقبلى سلامى وزهورى

مدونة يا أبت ... إني رأيت said...

كلامك صح الإخوان والحزب الوطني وجهان لعملة واحدة