Sunday, March 23, 2008

بحبك يا زوزّا

الحقيقة من زمان اوى وانا حاسة ان فيه حاجة معينة ناحيته


بس النهاردة اتأكدت


انا بحبه اوى


زوزّا بتشديد الزين التانية دى دلع زياد


اه حبيبى وبادلعه لو مش هادلع حبيبى هادلع مين يعنى


هاحكيلكوا اتقابلنا ازاى


مامته اتصلت بيا قالتلى لو سمحتى انا محتاجاكى تساعدى ابنى


وطبعا متأخرتش


وطبعا وانا باساعده اتعلقت بيه جدا


وبعدين اصل هو كمان طيب ومؤدب ومحترم جدا




كل دا صحيح انا مقولتلكوش ايه طبيعة المساعدة



الحقيقة انا كنت باذاكرله انجليش عشان هو فى لغات وصعب عليه اوى ومامته مش قادرة عليه


ايه دا شايفة ناس اتخضت


انتوا كنتوا فاكرين ايه؟


يا نهاركوا ابيض


لا لا مخكواا ميروحش لبعيد


زياد فى تالتة ابتدائى



المهم فضلت شهور بذاكرله وشغالة معاه بنظام المكأفآت
انا عارفة ان بينى وبين الاطفال ود والفة وحب من اول نظرة
بس مع زوزا الامر مختلف
زوزّا شرس بطبعه
ومستحيل حد يعرف يرضيه
ومامته دايما تشتكى من انه ممكن ينضرب برا وميجيش يقولها ولا يشتكيلها
شهور عدت عليا انا وزوزة وبعد ما كان بيكره الانجليش بقى يستنى اليومين اللى باذاكرله فيهم
فرحت وقلت الحمد لله الواد حب المادة
بس اكتشفت النهاردة حاجة تانية
انا كان بقالى اسبوع مشغولة ومش قدرت انى اقعد معاه خالص
وكان الحوار دا
انا :ازيك يا كابتن عامل ايه
هو:كويس
انا:ومالها من غير نفس كدا ليه شكلك اتعودت على الدلع بقالى اسبوع مريحاك
هو:وانتى بقالك اسبوع معبرتينيش ليه بقى
انا:والله كنت مشغولة اوى
هو:كان عندك ايه يعنى
انا:كنت مشغولة يا زوزّا
هو:مشغولة بايه طب
انا:مشغولة بقى فيه ايه
هو:طيب
انا:يا سلام على التكشيرة يا سلام
مامته تدخل تقاطعنا وبعد السلامات والكلام وشوية رغى
هى:هو زعلان منك
انا:ليه
هى:عشان طنشتيه , انا جبتله هدايا عيد الام للمدرسات بتوعه وقالى انه هايجيبلك هدية قلتله هى لسة صغيرة قالى لاء ماليش دعوة وأصر ان هو اللى ينزل ينقيهالك
انا وقتها قلبى كان هاينخلع منى من كتر الفرحة
زوزّا طلع بيحبنى انا وعشان كدا حب الانجليش
ينفع حد فى الدنيا يفرح زى ما انا فرحانة
اظن انى تعديت المسموح بيه بجد فعلا عمرى ما فرحت كدا
اد كدا الحب من غير مصلحة او هدف بيبقى جميل
الاجمل من دا كله ان زياد نزل مع مامته عشان يجيبلى الهدية وفضل و اقف فى المحل ساعة زة ما قالت مامته وفضل يوريلها كل حاجة ويقولها اجيبلها دى ولا لاء
لحد فى الاخر ما مسك عقد وقالها انا شوفتها بتلبس زى دا وجابلى العقد
العقد اللى هافضل طول عمرى احبه واشوفه اغلى من اى حاجة تانية حتى لو كانت ماس وبجد والله من غير مبالغة
العقد اللى علمنى يعنى ايه الدنيا فيها حب نضيف ونقى من غير اى مواد حافظة او اضافات
جاتلى هدية عيد ام يا حلولى يا حلولى
انا فرحااااااااااااااااااااااااااااااانة

4 comments:

TAMTAM said...

ربنا يخليكيا زوزة باشا
وتفرح الحجة كدة دايما
طب مافيش هدية لصاحبة الححجة ولا ايه؟

الأستاذ said...

الله عليكي
كل سنة وإنتي طيبة وهو طيب ومامتك طيبة
ربنا يخليكوا لبعض
فعلاً الحب من غير مصالح ده جميل أوي
تحياتي

Anonymous said...

جميل عالم الأطفال كله براءة

Yasser Elgohary said...

انا بدور على بوستاتك الغير سياسية وبقراها عشان متفكريش انى بنفض للبوستات اللى فاتت :))