الفرحة فى العيد مجانية
محدش يقدر يمنعها
جوا عيونى مستخبية
سامعة صوتها بتخبط
على بابى بتستأذن فى الدخول
لكن يا ترى المكان اللى مات فيه الامل
ممكن يساع فرحة زايرة
هتروح تلحق ناس تانيين لو لاقتنى مكشرة
هتصبر عليا وتقولى معاكى لحد ما تحسى
وتشوفى
وتسمعى
ولا الوقت مبيستناش
وفرحة العيد دايما مستعجلة
مبتعبرش الا اللى قلبه اخضر
اما اصحاب القلوب الدبلانة
مبيسمعوش خبطها على بابهم
مبيشوفوهاش غير وهى معدية
بتشاور كأنها هتلحقهم قبل ما تغرقهم احزانهم
ولما يدققوا فى وشها
يلاقوها بتقول باى
العيد حضر لناس مستنياه
واعمل ايه اذا كنت مشغولة
بوجع عمانى عن العيد ولقاه
ويرجع يلاقينى مقتولة
جوا همى وحزنى وحرمانى
وقلبى اللى اتدشدش مية حتة
اكبر حتة فيه بقت قد اصرارى
على يوم الاقى فيه الفرح بيدق على بابى
ويستنانى
واطلعله من غير طرحة
ويشوف دمعتى يقولى استنى
يا بنتى الدمع صار غالى
لسة جوا قلبى مكان
لام تطبطب وتهون
ولاجل فرحة فى عينيا تصهين
عن حق هو كان واجب يوم ما كنت مكسورة
ومعذورة
وصرخة وقت ما طلعت كانت فى قلبى معصورة
مع المساكين
لسة مشتاقة لاب يلمس شعرى
يضحك ويقولى يا مضروبة
كبرتى
وانتى اللى زمان كنتى
عنباية مرمية فى بستان
طرحت شجرة بتلمع
ومضللة على احزان
وهو كمان
حتى هو
لو رجع هيلاقينى باقوله بعودة
هعاتبه واقوله ازاى عنى تتخلى
وتدوخنى فى دنيا طول عمرها عليا
قادرة
بس افتكرتها معاك هاتتلون
وهاقدر عليا وحاتتهون
فجأة تسيبنى واقعة فى طريق تلجه بيدوب
مع انك عارف
ان عومى كلابى
وان احتمالات نجاتى ضعيفة
ان مكانتش معدومة
وانك يوم ما وعدتنى تعدينى الطريق
سبقتك عربية عشان تبعدنى
وتصدمنى
وتقولى فوقى
هو مش ليكى
لا عمره كان ولا هيكون
ولا عمر اللى زيك ليها فرحة تكمل
الا لو رضى عليها رب العالمين
وانا باشحتها منك
يا كريم
نفسى فى عيد واحد
استناه بالضحكة والكحكة
واسهر حاضنة هدوم العيد
انام فى حضن ام بترقينى
بايديها اللى هتصحينى اصلى العيد
و فستانى ابوكوريشة بمبى
وفيونكات الوان
يتوسخ من اللعب مع ولاد الجيران
والعجلة اللى وقعتنى عشان لسة مبعرفش اسوق
وطنط اللى ادتنى كركديه
وقالتلى اشربى شربات
وفرح بنت الجيران اللى هتتجوز النهاردة
وبصتى ليها وانا باقول امتى
هلبس انا كمان الابيض
وامسك الوردة واحدفها
على نسمة ونادية وهند
ويمسكوها كلهم ويضحكوا
لسة عندى امل اسمع فيروز بتقولى
دخلك يا طير الوروار
نفسى تبطل تفكرنى انه ما حدا نطرنى
ولا حد اتحملنى
يا ليلة العيد ليه عليا قاسية كدا
استنى شوية يمكن افتحلك بابى
ولو ملاقتش المفتاح والنبى ما تنسى
بنت بتحلم بفرحة
وقلب صافى
وضحكة واضحة
اوعى تنسى
No comments:
Post a Comment