انا بصراحة مبقتش فاهمة
هو الجيش معانا ولا ضدنا
هو الجيش بيحبنا ولا بيكرهنا؟
هو عايزها دولة مدنية ولا عسكرية ولا دينية ولا عايز حسنى مبارك ولا عايز ايه بالظبط
هو الجيش دا ؟
ودا ؟
ودا ؟
هو دا اللى هتفناله الجيش والشعب ايد واحدة؟
هو دا الجيش اللى طول عمرنا نعرفه
واللى اتقال انه حمانا من جبروت المخلوع ومنعه يقتل مننا الاف تانية
طيب لو دا مظبوط
الجيش سايب البلد من غير غاز ولا جاز ولا عيش ولا اكل ليه؟
سايب الناس تكفر بالثورة وتعلن يومها واللى عملوها ليه؟
طيب وسايب البلد من غير امن ليه ؟
مش حاسم مع التطرف ومصر على المجالس العرفية ليه؟
تدوينتى كلها علامات استفهام وعارفة انه شىء ممل جدا
بس الممل اكتر هو ان بعد الثورة نبتدى نسمع عن سجن حربى
وظباط جيش بيعذبوا ثوار
ونيابة عسكرية
هو طنطاوى حزب صحيح؟
طيب ولو هو حزب الشعب
سايبها خربانة ليه؟
سايب شوية يعذبو الشباب ليه ويعتقلوهم ؟
ليه مش بينقل المخلوع طرة؟
والحرامية الكبار بيخرجوا واحد ورا التانى ازاى؟
مش باقولكم انهامدونة كلها استفهامات ومملة
بس هو الجيش ولائه لمين؟
والعسكر عايزين يمشوا بعد ست شهور من الثورة بناءا على انه هايسيبوها لمين؟
للدقون؟
ولا لبواقى الحرامية اللى هيشتروا مجلس الشعب بفلوسهم
؟
اعتقد انها اسئلة مشروعة جدا
خصوصا بعد شهادات الناس اللى اتعذبت فى السجن الحربى
وتعامل الشرطة العسكرية مع معتصمين السفارة الاسرائيلية فى ذكرى النكبة
حابة يبقى فيه بيان توضيحى
يقولنا اللى اتقال للى اتعذبوا على ايد الجيش كان ليه
وبيعبر عن مين
حابة اعرف اجابة لاى علامة استفهام من اللى كتبتهم
No comments:
Post a Comment