Saturday, May 3, 2008

اسكندرية ماريا وترابها زعفران

طبعا مليون فيلم واغنية ومسلسل واعلان وكل حاجة اتعملت عن عروسة البحر الابيض والاحمر وكل البحور وكل الدنيا العروسة اسكندرية
مش باقول كدا لانى اسكندرانية حتى النخاع بس
انا باقول كدا لان البلد دى بيعشقها الاسكندرانى واللى مش ,صحيح احنا بنحبها بزيادة وبنموتوا فيها بشكل لا يوصف بس اسكندرية من قديم الازل وهى اجمل وارقى واحسن مصيف لاى حد فى مصر ,بيفضل الولد يذاكر طول السنة والرجل يشتغل طول السنة والست تشقى فى البيت طول السنة عشان فى الاخر هايروحوا يقضوا شهر فى جنتها وعلى شطها ورملها وبحرها وشوارعها اللى زى الفل
اسكندرية بالنسبة لناس كتير اوى مش بس مصيف هى كمان مكان لذكريات جميلة ومرتبطة باحداث فارقة جدا فى حياتهم يعنى هى بلد المصيف وبحرها بيغسل هموم الشقيانين طول السنة وكمان معظم الناس بتقضى فيها شهر العسل بتاعها ودا بيخلي اسكندرية مرتبطة مع ناس كتير باجمل ايام العمر
كمان الجزيرة اللى اتربطت بقرية وبتطل على اجمل فيو للبحر المتوسط مش بس الذكريات فيها على الشط والبحر
كمان شوارعها من القلعة والانفوشى لحد ابو قير مرورا بقى بالمعمورة والمنتزه ولوران وستانلى وسان ستيفانو وزيزينبا وجليم ومعاك طبعا المنشية ومحطة الرمل والسلسلة وكل مكان فيه ريحة البحر ووشوش البحراوية بصفائها ونقائها وجمال البحر اللى مديها منه حتة
كل دا كوم وارتباط الناس باسامى مطاعم هنا زى حسنى وقدورة ومحمد احمد واسامى محلات زى عزة وغيرها وكل الاماكن دى بتقدم انواع اكل على اختلاف اشكالها هى بتستمد جمالها وروعتها اللى متتنسيش من جمال وروعة المكان والجو والوشوش اللى بتقدمهالك
كل دا كانت مقدمة سرحت انا فيها ولو هاسيب نفسى هانتكلم للصبح
عايزة من البوست دا اقول ان خوفى فى الوقت دا واكتئابى بيزيد بشكل ملحوظ ودا بيحصلى كل سنة
لان اسكندرية بتاعتى الجميلة المصونة بتتهان وتتبهدل طول شهور الصيف
هجمات مصيفين من الاقاليم بشكل وحشى بيبهدلوا فى البلد كأنها والعياذ بالله قوات غزو جاية تقضى على بلد كفار مثلا!!!!!!!!
البلد بنتنهك بشكل مبالغ فيه وياريتها بتيجى على قد الزحمة وبس لكن تخريب المرافق وتلويث البحر وبهدلة الشوارع والزبالة اللى بتترمى فى نص الطرق الرئيسية بجد حاجة تقرف
انا باستعد دلوقتى لحبسة طويلة اوى فى البيت هاتمتد طول شهور الصيف لانى لا هاستحمل الزحمة ولا هاستحمل بردو اشوف بلدى وهى بتنتهك باسم السياحة الداخلية
ربنا يصبرنا ويعدى الشهور دى على خير

18 comments:

عبد من عباد الله said...

و عمار يا اسكندريه يا جميلة يا ماريا
بجد نفسي ازور اسكندرية .. بس بعد الكلام اللي قولتيه خايف زيارتي تدايقك و تبقى احد اسباب حبستك في البيت دي مش عايزين نبقى ضيوف تقال عليكي .... شكراً للإسكندرانية

ظل الشمس said...

بالعكس
دى زيارتكم بتنورنا وتزيدنا بركة والله
ضيوف اسكندرية طول السنة بيزوروها
بس ضيوف الشتا والخريف بيحبوها وبيحافطوا عليها وبيتعاملوا بمنطق انها بلدهم اللى خايفين عليها
زوار الصيف اللى باشتكى منهم لا تتخيل بينتهكوا حرمة البلد ازاى
مستنيينك تنور اسكندرية وتزيدها شرف لانها بتحب كل اللى بيحبها وبيخاف عليها

بنت مصريه said...

بصراحه انا حاسه انك بتتكلمى عنى
انا من القاهره
بس كان نفسى اكون من اسكندريه
بجد بلد روعه
كل حته فيها حلوه
وشوارعها نضيفه قوى
الله عليكى يا اسكندريه
اعيلنا بقى نطلع فى قرعق المصيف السنه دى وتجيلنا اسكندريه يا رب
احييكى

بنت مصريه said...

ادعيلنا نطلع فى قرعه السنه دى
اسكندريه

shaimaa samir said...

ياااااااااه
نفسى اعيش فيها جداااا
ربنا يووعدنا
ههههههههه
المهم عندك حق فى موضوع البهدلة ده
حطيت نفسى مكانك طول السنة
ومرةواحدة
هب تلاقى افواج بشرية
عندكو حق
بس قريبنا بيصفوا فى مرسىمطروح اللى من اسكندرية
ربنا يكرمك
بوست جميل

ظل الشمس said...

بنت مصرية منورانا والله وعلى فكرة اسكندرية بتمووووووت فى اللى يحبها مش بس بتحبه
ويارب تيجى تنورينا السنة دى احنا عايزين كل اللى يزورها يكون بيحبها ونشيلكوا فوق راسنا والله
اللى باشتكى منهم بيبهدولها واكييييييييييد مبيحبوهاش
نورتى مرة تانية:))

ظل الشمس said...

شيماء منورانى جداااااااا
ويارب تعيشى عندنا ان شالله وهانديكى الجنسية مش تقلقى يعنى مش هاتمرى بمرحلة الجرين كارد جنسية على طول:))

mohamed said...

أسكندريه تحفه و اللي يعرفها كويس هيحبها أويييييييييييييييييييييييييييييييييييييييييييييييييييييييييييييييي

ghoneem said...

اهلاً بيكي

انا اتشرفت بمدونتك وطبعاً اتشرفت جداً بزيارتك وكلامك .....

حظي حلو ان أول بوست اقراه يكون عن اسكندرية
فيه عشق خاص ليها من بعيد لبعيد كدة

انا من بتوع الأقاليم اللي انت زعلانة من هجماتهم وتشويههم لجمال الأسكندرية
عشان كدة بقي انا مش باجي اسكندرية نهاااااااااائي وعمري مازورتها قبل كدة
!!!!!!!! تخيلي بقي
بقوللك عشق من بعيد لبعيد

ربنا يمتعكو بأسكندرية وجمالها ويحفظها وأهلها دايماً من كل سوء

تحياتي

بالتوفيق.........

Unknown said...

دايما بكون قاعد علي كبري استانلي ومبعرفش اكتب حاجة خااالص غير لما بكون قاعد هناك
بطلع بقي كل الفنون
بجد بوست جميل

أم أحمد said...

انا بحب اسكندرية اوي
صدقيني الناس اللي بتخرب فيها دول الرعاع
اللي مش بيخربوها بس دول بيخربوا كل حتة بيروحوها ربنا يرحمنا من الجهلة
الجهل هنا جهل بيئي

أم أحمد said...

انا بحب اسكندرية اوي
صدقيني الناس اللي بتخرب فيها دول الرعاع
اللي مش بيخربوها بس دول بيخربوا كل حتة بيروحوها ربنا يرحمنا من الجهلة
الجهل هنا جهل بيئي

CrY2DaY said...

زورت اسكندرية مرة واحدة فى حياتى وكمان كنت فى معسكر بس على مين مقدرتش اقعد فى المعسكر وهربت طبعا واتكدرت بدل المرة عشر مرات ملفتشى فيها كتير بس نفسى اجى اسكندرية فى الشتا فعلا اكيد هاتكون حاجة تانى غير الصيف خالص

ــــــــــــــــــــــ
دعوة لفعل الخير

اتمنى زيارة مدونتى

تحياتى

ظل الشمس said...

cenotaph
اسكندرية بتحب كل اللى بيحبها واللى بيفكر يحبها^_^

ظل الشمس said...

غنيم

انا مش زعلانة من هجماتهم ولا من الاقاليم بالعكس اى حد يحب تكون بلده مزار سياحى
بس الفكرة ان العشم بيننا وبين بعض الناس بزيادة شوية فمش بيعاملونا على اننا مكان سياحى وبيجوا يبوظوا كل حاجة ويمشوا
طبعا الكل ينور ويشرف بجد
بس انا بتكلم عن فئة معينة
اتمنى انك تشرفنا بالزيارة ويكون العشق من قريب مش من بعيد لان بجد القرب حاجة تانية خالص

نورت

ظل الشمس said...

dew
زيارتك هى اللى اجمل من البوست
وبجد الكوبرى رغم انه دايما بيتجاب معماره وهيكله بس مفيش اجمل من منظر البحر حواليه وشكل الغروب من عليه

ظل الشمس said...

أم احمد
نورتينى وعندك حق فعلا
اى مكان هايروحوه هايشتكة منهم بردو
ربنا يعافينا ويعافيهم ويحمينا من هجماتهم

ظل الشمس said...

cry2day

ان شاء الله يكون فيه زيارة تانية فيها فسحة اكبر من المعسكر
نورت