كل سنة بتواجهنى نفس المشكلة
ازاى هافتكر اكتب رقم السنة الجديدة فى التاريخ ومش هاتلخبط واكتب الرقم القديم
كل بداية سنة كمان بتفكرنى ان سنة من عمرى راحت
وياترى السنة اللى راحت كانت محسوبالى ولا محسوبة عليا
يمكن بافكر كدا لانى من مواليد يناير فبداية سنة جديدة لكل الناس هى بداية سنة من
عمرى كمان
ويمكن لانى باخاف من التغيير وباخد وقت على ما اتقبله
ويمكن لان التغيير دايما مربوط بالنسبالى بكل الحاجات اللى قلبت حياتى رأسا على عقب
زى ما بيقولوا
بس فى كل الاحوال
كل سنة وانتوا طيبين
مدونين كتير بيكتبوا عن السنة الجديدة
كل واحد شايفها ازاى
وكل واحد شاف السنة اللى قبلها ازاى
يمكن انا مكملتش سنة هنا فى ظل الشمس
بس انا ارتبطت بيها اوى لدرجة انى بقيت باجر كل المشاكل والهموم واجى هنا ارميها
واقعد اشوف هاوصل بيها لفين
وكعادتى
جيت هنا واحنا على اعتاب سنة جديدة
وهاسيب هنا شوية كلمات باقولها لاقرب حد ليا على الاطلاق
هاقول لربنا اللى مفيش اقرب ولا احن ولا ارحم منه
يارب
لو كانت السنة اللى فاتت تعب لناس او سببت وجع ليهم فخلى السنة دى بداية راحتهم
وسعادتهم يارب
يارب
لو كانت السنة اللى فاتت فيها عذاب وشقاء لحد فخليها السنة دى نهاية العذاب دا يارب
يارب
لو كانت السنين اللى فاتت كلها رمز لضلال ناس او معصيتهم فاجعل السنة دى بداية
هدايتهم وقربهم منك يارب
يارب
فيه واحدة من عبادك الدنيا تعبتها اوى وانت عالم ازاى
شكوتها ليك انت من كل حاجة واى حاجة انت عالم ازاى اثرت على حياتها
هى يارب واقفة على بابك مستنية سنة جديدة
مستنية نهاية لكل حاجة وجعتها ولسة بتوجعها
مستنية بداية لرحمة انت اهل ليها يارب
وعفو مش غريب عليك
وكرم مصدره انت يا كريم
يارب خلى 2007 و 1428 نهاية كل شر
وتكون2008 و1429 بداية كل الخير
ياااااااااارب
حققلنا احلامنا
ورينا بعيوننا الدنيا وهى بتتغير حوالينا فى صالحنا
ومتوريناش تانى احلام بتموت قدام عينينا واحنا مش عارفين نعمل لها حاجة
يارب
رحمتك وعفوك
وكل سنة وانتوا طيبين
2 comments:
يارب
باتمنالك كل الخير
وباتمنى لو الدنيا تدينى الفرصة واقدر اعرفك اكتر واقرب منك
انا باعيش فى كل سطر بتكتبيه
حقيقى حاسس انى عارفك كويس اوى ومن زمان مع انى معرفش حتى شكلك ايه
2008 سنة مقدرش انساها هى السنة اللى هاجرت فيها وسبت البلد ومن وقتها مرجعتش ليها الا زائر بس يلا الحمد لله على كل حال
Post a Comment