Monday, November 12, 2007

يعنى ايه نقاطع المصرى اليوم يعنى؟

صلى على النبى يا سيدى
لاء
وزيد النبى صلاة

طب وحد الله
وحده تانى يا سيدى


اشهد ان لا اله الا الله وان محمد رسول الله

انا قلت الشهادتين اهه
وهاقولكوا بعدين قلتهم ليه

كنت قاعدة على وشك انى اوقف عضو فى المنتدى بتاعى اذ افوجىء بميل جايلى مرتين
قلت درءا للملل اشوف مين عبرنى وبعتلى ميل
لاقيته من مدونة مظلومين
وبيقول فيها انى لازم اقاطع الصحيفة الصفرا
انا خدنى الفضول بصراحة
قلت هاشوف صورة روزا والبطل عبد الله كمال
او الاهرام
او الجمهورية

الاقى ان المطلوب اثباته هو المصرى اليوم
يا نهاركوا ابيض مخطط كاروهات فحلقى؟
مصرى اليوم نقاطعها
؟
مش ده الجورنال اللى نشر اعترفات المستشارة نهى الزينى يا جدعان؟
مش ده الجورنال اللى رئيس تحرير الرجل الرفيع اوى اللى اسمه مجدى الجلاد ده اللى بيخلى الاعتذار بتاع الخبر الغلط يتنشر فى نفس مكان وبونط الخبر نفسه
مش ده الجورنال اللى كان جايب صور البلطجة بتاعة الحزب الوطنى وشكل مصر وهو عامل شبه الثكنة العسكرية؟
الله

ده مفيش مصرى اليوم غيره يا جدعان
فتحت المدونة ظهرلى من الوهلة الاولى انها اخوان
قلت اوك
يبقى ممكن تكون المصرى اليوم بتحض على الرزيلة ولا حاجة
وبم ان الاخوان ملتزمين فقالو هانقاطعها

لاقيت بداية المقال الصورة دى




والحبيب المدون بيقول انها مش قضية اخوان دى قضية كل المدونين الشرفاء


وطلعت الحكاية ان المصرى اليوم يالوقاحتها


راحت بمنتهى البجاحة والصفاقة وقلة الذوق نشرت خبر عن انقسام جوا الاخوان وانشقاقات بين كوادر

الاخوان وشبابها


مش باقولكوا صفاقة!!!!!!!

طيب هو انا ممكن اقول حاجة حضرتك


من غير شخط يعنى

هو ايه يعنى لما المصرى اليوم تنشر اخبار كل يوم حتى عن الاخوان


هما مش جماعة وكيان نشط جوا مصر ؟


وايه يعنى لما يتقال ان فيه انشقاق جوا الجماعة؟


غلطنا فى الذات العليا لا سامح الله؟.


ولا قالوا هما فيه انشقاق بين جماعة مألفة من رسل وانبياء ومنزهين عن الاخطاء؟


مش بشر يا جماعة وارد يبقى فيه انشقاق او شوية ضغائن ؟


يعنى خلاف على علبة مناديل


خلاف على باكو لبان


بنى ادمبن بردو

طيب سيبك من اللى فات دا كله


اعتبرنى عيلة وغلطت

المصرى اليوم يا سيدى لفقت خبر


ملفقين الناس دى


ربنا يسامحهم بقى

عملتها ليه بقى حضرتك قضية رأى عااااااااااااااااااااااااااام؟


بقت قضية قومية بقى ولازم كل الشرفاء يقاطعوا المصرى اليوم عشان اتكلمت عن جماعتكم المصونة؟


انا مصرية


والاخوان جزء من مصر


بس مش مصر كلها


بدليل انى مصرية ومش اخوان


تحب تشوف الباسبور؟

يا شباب الاخوان ارحمونا


التمسك بالفكر والدفاع عنه حاجة


وفرضه على الاخرين حاجة


مصر هى مصر


مصر مش اخوان مسلمين


مصر مسلمين وغير مسلمين

وعشان انا عاملة حسابى من الاول
قلت الشهادتين خشية اتهامى بما لا يحمد عقباه

هاتقولى مكبراها


هاقولك ماهو اذا كان الجورنال المسكين مغفرلوش تاريخه ولا انجازاته واتقال عليه اصفر لمجرد خبر

معجبكوش


امال هايتقال عنى ايه


الاحتياط واجب بردو

وعموما


احب افكركم

الحكومة اللى مش عاجباكم تصرفاتها انتوا برد الفعل ده متفرقوش عنها كتير


هما كمان لما بيتهاجموا من جورنال


بيلونوه بالاصفر

9 comments:

محمد جمعه said...

بسم الله أبدأ
اولا مدونة جميلة حقا واسلوبك فى الكتابة رائع وعذب
ثانيا: بالنسبة للموضوع ده
انا بقرأ المصرى اليوم
لاكن حضرتك حصل وقعة امامى من هذة الجريده فكره حضرتك الا حصل العام الماضى الا اطلقوا عليه احداث الازهر
الا الجرنال المحترم قال عليه مليشيا الاخوان فى الازهر
حضرتك ان عرفه ان المصرى اليوم
هو الجرنال الوحيد الا انفرد بالصور انتى عرفه مين الا ارسل لهم الصور
الطلبة الا عملوا الوقفه
وبعد سؤء لفهم الاحداث وضح لدى الطلاب انهم وقعوا فى خطأ
فكان من الواجب عليهم الاعتذار
فذهبوا بالفعل نفس الاشخاص الا اعطوا لهم الصور
ذهبوا لهم برسالة اعتذار لتنشر فى نفس المكان و
ولاكن اعتذرت المصرى اليوم عن النشر
انا بسال حضرتك ليه المصرى اليوم منشرتش
هو مش من الميثاق الصحفى ان من حقى ان اوضح وجهة نظرى فى امر يخص صاحب الموضوع
حتى لوكان فى اختلاف
ولا ايه؟
اما بخصوص الا نشر
حضرتك
المصادر الا اخذت عنها المصرى اليوم موقع نت الله اعلم مين الا عمله

Unknown said...

إلى الأخت الفاضلة التي فرضت رأيي عليها - وبصراحة معرفش أزاي فرضت رأيي عليكي- المهم

وصلني تعليقك وبجد أنا سعيد به لأن هذا يفتح مجال مثمر للحوار

بالنسبة للمصري اليوم تلك الجريدة عهدنها أنها جريدة لا تنشر إلا الخبر الصادق أما حكايتها مع الإخوان مش طبيعية اليومين دول من ساعة ما مشروع برنامج الحزب اتنشر

وعشان ابقى موضوعي مش الإخوان بس اللي بيقولوا كده ده مفكريم مثل ضياء رشوان قالها بصراحة خط جريدة المصري اليوم انحرف

يعني مش رأي الإخوان بس

ثانيا الموضوع مش موضوع خبر لما عملوا هوجة طلاب الأزهر - ومعك حق لو قلتي أنه غلط لأنه غلط اللي حصل بس احنا عملنا من الحبة قبة- راح الطلاب وقدموا اعتذرهم لجريدة المصري اليوم ( اللي بتنشر الرد والأعتذار بنفس البنط في نفس المكان ) عشان تنشره زي ما نشرت الخبر رفضت ومنشرتش الخبر

انا لما أقول قاطع بوجه رسالة للمصري اليوم انتي رايحة غلط وأحنا كشعب صاحي سواء كان الكلام عن الإخوان أو غير الإخوان المهم عندي المصداقية التي افتقدتها الجريدة في تناولها لأخبار الإخوان بالذات

واسعد دائما بالرد على كافة الردود الهادئة البعيدة عن التشنج اللي زي ردك
والله ينور على المدونة

مالك مصطفى

السقا said...

سيبك من اللك ده من الاخر كده ولاني مش بحب السياسة الاخوان دول لابيعجبهم العجب ولا الصيام في رجب

koukawy said...

التعنت و سنينه السوده

مدحت محمد said...

صلى على النبى
زيدى النبى صلاة
كمان وحدى الله
هو الواد برضه يقول اللى ليه واللى عليه
اكيد فى حرب شرسة على الاخوان
دى حاجة معروفة
مشكلتهم انهم بيعتقدو انى اى حد يتكلم
عن الاخوان بطريقة هجومية عليهم حتى لو كان من جماعة الاخوان
نفسها
هو ضدهم
وده سوء ظن ربنا
نهى عنه
بس جريدة المصرى اليوم الحقيقة من اجمل
وابرع
الصحف الموجودة حاليا على الساحة
وايضا
جريدة الدستور
تحياتى

تحفة said...
This comment has been removed by a blog administrator.
تحفة said...

"يا ابيض يا اسود، يا ابيض يا اسود !"
كان القاضي بتاع مسرحية شاهد مشفش حاجة، بيطلب من الشاهد انه يبقى حاسم في إجاباته علشان ديه قضية قتل و حيتعدم فيها واحد.
المشكلة إلي كانت عند البطل انه مكنش بيحسبها كده ، كان مبسط الامور زيادة عن اللزوم.
ما علينا ظروف القضية بتاعة المسرحية كانت بتحتم التفكير بطريقة ابيض او اسود، لكن القضايا إلي بنتكلم فيها عن جريدة او عن تيار سياسي او حكومة او او او
افتكر انه مينفعش نتكلم فيها بالطريقة ديه " يا ابيض يا اسود " " يا جريدة صفرا يا جريدة محصلتش " " يا ناس بيفرضو رأيهم يا أما احسن ناس " ... لا مينفعش الكلام بالطريقة ديه.
المصري اليوم ممكن تكون غلطت (طبعا ممكن ليه لأ) بس هيه برضه لسه عندها مميزات تانية
الاخوان او الاخواني إلي كتب موضوع المقاطعة ممكن يكون غلط لما وصف الجريدة بالصفرا( ممكن ليه لأ) بس لسه عنده منطق او مبرر لده و مش لازم يكون فرض رأيه لما قاله
إلي عايز اقوله اننا لما نيجي نتكلم في حاجة زي السياسة او عن موضوع يمس تيار سياسي مثلا لازم نفهم ان مفيش حاجة اسمها ابيض و مفيش حاجة اسمها اسود ، و ان كل الاحتمالات واردة و اسف على الإطالة

MR.Fox said...

السلام عليكم ...

بصراحة و من غير زعل مع حد انا بكرة الاخوان قد الوطني تمام الكره .... و ما بحبش دول و لا دول ... و اذا كان حد فاكر اني اشتراكي او شيوعي ...... برضة لا انا مسلم ليبرالي عادي زي بقيت المسلمين بصلي و بصوم و بشجع الحجاب ... عشان ما تقولوش ليبرالي كافر ......

المهم
انا قلت المهم : العملية مش ناقصة ديكتاتورية من دلوقت .... استنوا لما تاخدوا الحكم ...............

و بس

لو شايفة يت ظل ان انا هغتال وللا حاجة امسحي التعليق ...

:P :P:P

موجة said...

انتي رائعة
مدونتك هايلة
موضوع جميل جدا و طبعا حملة مالهاش اي داعي و نواياها واضحة .. رغم ان المصري اليوم مش هيا املنا في الصحافة و نتمنى نلاقي حاجة احسن من كده .. لكن هيا اكيد افضل اللي موجودين من صحف ..
الحملة طبعا من الاخوان لان الصحيفة نشرت عن انقسام في صفوف الاخوان
غريبة رغم انها الصحيفة الةحيدة اللي منصفة الاخوان في مصر من غير صحفهم الخاصة فبالسرعة دي نسوا كل حاجة و انقلبوا عليها ..
اسلوبك رشيق
تحياتي
سرتني جدا زيارتك الكريمة لمدونتي المتواضعة