ظل الشمس

عودة

noreply@blogger.com (ظل الشمس) — Mon, 04 May 2009 11:45:00 +0000

نحلم ..فتردعنا ظروفنا بقسوة
فنتنازل عن الحلم
ونكتفى فقط بالبحث عن الراحة
واذا ما شرعنا بالراحة ..تردعنا الدنيا بشكل مبالغ فيه
فنتناسى الراحة
وحينها يكفينا "نعمة الستر" و "نعمة الصحة"
وحين يكفينا الامان ..يصبح كثيرا علينا
بل وكثيرا جدا
فيتضائل الحلم سريعا الى دعوة مبللة بالدموع فى ساعة متأخرة من الليل بأن نظل نتنفس
فتصل الامانى الى امنية واحدة
امنية البقاء

حينما تخبر احدهم انك على وشك اجراء عملية دقيقة لاستئصال ورم قد يكون ردة فعله هى الحافز او المثبط
فحين يتجاهلك لاكمال لعبته التى بدأها على الفيس بوك منذ فترة ولا يطيق الانتظار لربما يتضائل حجم مكاسبه الذى حققه فى تلك اللعبة
تشعر حينها ان خوفك يتلاشى
فلم تخاف ولا احد يكثرث
ولكنك حين تتذكر الليلة السابقة وكل الذين تكتموا الامهم بقلوبهم واكتفوا بكلمات المواساة والتشجيع لتتغلب على ما اصابك
حين تشعر بعيونهم تدمع بحرارة ويحاولون بجهد اخفاء هذه الدموع
حين تتحسس برودة ايديهم وهم يرتجفون رعبا وفى قلوبهم دعاء بالا تفارقهم
حينها ... تشعر بان هناك ما يربطك بهذه الدنيا
او بمعنى لغوى ادق
هناك من يربطك بهذه الدنيا
ويجعل عينيك المبللة بالدموع فى ساعة متأخرة من الليل تدعو ان يبقيك الله لهؤلاء
فقط لتراهم سعداء

ادعولى

ورحل هو ايضا

noreply@blogger.com (ظل الشمس) — Sat, 09 Aug 2008 23:23:00 +0000

البقاء لله

انا لله وانا اليه راجعون

اللهم اجرنا فى مصيبتنا واخلفنا خيرا منها

noreply@blogger.com (ظل الشمس) — Sun, 13 Jul 2008 18:57:00 +0000

أنا الآن ألمح غزاة يملأون المحيط صخبا ..

وقلوبا مهترئة تركت أصحابها في العراء ..

ورحلت إلى حيث يلهو بها الغرباء كما يلهون بأمتعة فندق رخيص .,

أراهم يكتبون على جدرانها عباراتهم البلهاء ..

وأسماء أصدقائهم وأعدائهم وعبثا آخر لا يعني في الغالب شيئا .,

أنا الآن أشتاق لأن أقف أمام محيط لا متناه .. أعانقه بهيكلي ..

ألثم أعاصيره ببقايا فمي .. ليمتصني ويسكنني أحشاءه كجنين .,

أنا الآن أبلع مشاعري كأقراص دواء ..أتعاطاها كمخدر ..

أكتبني وكأنني وصفة الخلود المحظورة على الكائنات المؤقتة ..

ومن الجميل أن لا أحد سيصدقني .,

أنا الآن ..

وبعد أن حاولت بكل ما أوتيت من صلف أن أصنع حاجزا بين ضحكاتي ودمعاتي أفقت على سدودي تنهار لتمتزج أشيائي العذبة البسيطة بملوحة صدقي ..

أحاول أن أهرب من ذئب الحزن الجائع .. وأتحاشى قبضته المعتوهة ..أقنع ساعاتي أن تقتات بفتات فرح .,أبحث عني في جيوبي فلا أجدني ..

وأبعثر صندوق كلماتي فلا أجد أصدق من عبارة الوداع

-أغسّل بها روح من أحب .. وأمضي..

.أنا الآن .. أطييير إلى بعييييد ..

حيث لا يعبون حزنا أو يمضغون كآبه .. حيث لا يتنفسون هواءا مستعملا !

****************************

كلمات قالها احدهم

آثرت ان انقلها هنا ليس فقط لبلاغتها وعمقها

وانما لتحمل مدونتى شيئا منه

وتصير كلماته جزءا من كلماتى

ربما تفعل الكلمات ما يعجز البشر عن فعله

ربما تلتحم وتصير جزءا واحدا متماسكا بينما تبعثرنا انانيتنا وشكوكنا وخوفنا واعاصير حياتنا..

التى دائما ما تجتاحنا وتنتزع احلامنا من جذورها...

لتلقى بها بعيدا...بعيدا جدا

حيث لا نعرف

ولا حتى ندرك

يراودنا حينها احساس, او دعنا نقول تنبؤ... باننا يوم ما, سنبحث عن تلك الاحلام التائهة فى فضاء فسيح...

فضاء يخلو من كل شىء سوى تلك البقايا المبعثرة لذواتنا

واشلاء ممزقة كانت يوما ما تجتمع معا لتكون ملامحا ممزقة

لازالت تحلم بالخروج من عتمة خوف وضيق وانكسار كان خاليا من كل شىء

الا صدق النفس مع النفس فيما تشعر وتحلم وتتمنى وتشتاق وتتطلع

واحيانا

تحب

اتساءل احيانا

ماذا لو كانت البداية مختلفة

او ان كانت البداية لم تبدأ

تفكير جنونى

لازلت اذكر حينما ترك عالمنا ليرحل هربا من نهاية اظنه كان يشعر بقدومها

حاول الهروب لكنى بحماقة منقطعة النظير

طلبت منه الا يرحل

الومنى كثيرا

فانا السبب فى فراق يشطرنى الآن

فراق جعل منى بقايا لشىء ما كان يوما يطير فرحا وينفطر حزنا بل وقد يجن صراخا ايضا

ولكن صوتا يوقفنى عن جلد ذاتى ليذكرنى باننى لم اكن لاجرؤ على تصور اختفاءه من حياتى

والآن

لا بديل

للاسف

لا بديل

ولكنى لازلت احتفظ له بشىء ما

ها هو

ودعاء ان يحفظه الله
دعاء من القلب
^_^

انا وفادى

noreply@blogger.com (ظل الشمس) — Fri, 11 Jul 2008 23:36:00 +0000

عذرا ان كنت قد تسببت فى ارتفاع مبيعات ادوية ضغط الدم ولو بنسبة ضئيلة تساوى عدد من قرأوا وزاروا المدونة فى الايام الاخيرة

ولكنهاا لحياة

تشعرك كلماتى اننى عجوز شارفت على الموت وتستعد الآن بشراء كفنها وتقديم وصيتها وكل تلك الطقوس التى يفعلهاا لقادر عليها حينما يشارف على نهايه العمر

اؤكد لك سيدى القارىء انك ولله الحمد

غلطان

(عادى كلنا بنغلط بالمناسبة)

اما عن عنوان البوست فهو الامر الذى يخرج بالمدونة عن سياقها ونهجها فى الاونة الاخيرة املا منى فى استعادة بعض المرح الذى يتوافق ولونها الوردى الهادى والذى يتنافى والوان تدويناتها القاتمة السواد

كنت استقل حافلة

على يمينى يجلس رجل خمسينى ملتح يبدو عليه الصلاح وعن يسارى يقف طفل فى الخامسة يبدو انه سأم ان تبقيه والدته بجوارها فقرر التنزه بالحافلة حاملا (عوامة) و(كرة جلدية) وحريصا على ان يظهر شعره الناعم المنسدل على عينيه فى مظهر لائق رغم انشغال كلتا يديه باحماله الصغيره

وقف بجانبى وقد سقطت كرته

فناولته اياها: كورتك يا كابتن

فأجابنى فى اباء:شكرا

واكمل طريقه ليصل الى نهاية الحافلة وكأنه فى جولة تفقدية

ثم همّ عائدا وكأنه قد اكمل عمله على افضل ما يكون ومر بجانبى فسقطت عوامته

فناولته اياها :عوامتك يا كابتن

فأجابنى فى ضيق:شكرا

وفجأة

وقفت الحافلة فجأة مما سبب سقوط العوامة والكرة وحارسهما الصغير

سقط على وجهه

حملته من على الارض واجلسته بجوارى وظللت اهدأه وهو يصيح:

كورتى

فالتقطتها واعطيته اياها

فصاح مرة اخرى

عوامتى

فالتقطتها ووضعتها فى رقبته وظللت احادثه

يا كابتن ماهو مفيش حد يتمشى فى الاتوبيس كدا كأنه فى جنينه بيتهم

بيتنا مفيهوش جنينه

ولا احنا

صاحبى بيته فيه جنينه

انا لو منك اسيب الكورة دى فى البيت وماخودهاش الا وانا رايح لصاحبى العب فى جنينه بيتهم

طيب هاسيبها بس انا بردو بحب العب بيها عند تيته

هى عندها جنينه ؟

لاء

ولا تيته بتاعتى عندها جنينه

واجده يضحك عاليا

فانسى كل شىء واضحك انا الاخرى

ويسألنى

اسمك ايه

شهد ..وانت؟

فاذا بصوت والدته يجيبنى

يلا يا فادى صدعت طنط

انا ماشى بقى هابقى اركب الاتوبيس تانى

وانا كمان

باى

وتمسك والدته بيده وباليد الاخر يمسك هو كرته وتظل عوامته معلقة برقبته كما وضعتها انا

وبينما انا ارقبه حتى يغيب عن نظرى اذا بصوت الرجل الخمسينى ينطلق بجوارى

اهو طلع فادى

وايه يعنى

مسيحى يعنى

لم استطع الرد

لم اكن بحاجة ان ينبهنى الى هذه الملحوظة فقد لمحت الصليب على يديه الصغيريتين منذ ان كان يتفقد الحافلة

ولكننى ظللت افكر

ما هو تحديدا شأنى انا بكونه فادى او شأنه هو بكونى شهد

وفجأة وجدت من ينادى ملوحا

باى باى يا شهد

فاذا بى الوح انا الاخرى

باى باى يا فادى

وتركا الحافلة هو ووالدته وقد توقفت الحافلة فى احدى الاشارات

وظللت انا اتابعه بنظرى

وظل هو ملتفتا برأسه الى الخلف ملوحا

ارحل بهدوء

noreply@blogger.com (ظل الشمس) — Sat, 28 Jun 2008 23:30:00 +0000

كنت حينها اجرى مسرعة بشكل جنونى بينما تتقطع انفاسى وتتمزق ولم اعد قادرة على التنفس

كان شكله مريعا وكنت اهرب حتى من النظر اليه

ولا اعرف من هو فلم اره من قبل

لم يكن لدى خيار سوى الاختباء

ولم اجد سوى الشرفة

فاختبئت بها

اذا به يقذفنى منها

ظللت اتشبث بحبال تتقطع واحد تلو الاخر حتى صرت على وشك السقوط

وفجأة

ظهر هو

ومد يده

والتقطنى

وظللت اصعد واصعد

كانت عيناى متعلقة به هو بغض النظر عما كنت فيه قبل قليل

انت جيت يا بابا ؟

اطلعى الاول بس

متمشيش تانى بقى

يا بنتى اطلعى الاول

طيب انت هاتمشى؟

ويختفى ابى مرة اخرى بعد ان ينقذنى

اهرع لابحث عنه فى كل مكان فلا اجد سوى اشواك تدمينى وانا اصرخ لانادى عليه ولا اشعر بألم

فقط ارى دمى ينزف

واخيرا اجده واقفا حزينا ينادى على ولا استطيع الوصول اليه

فاسقط من جديد

واصرخ

اعوذ بالله من الشيظان الرجيم مالك يا بنتى فيكى ايه ايه حكاية الكوابيس اللى يوماتى دى

وتناولنى كوبا من الماء وتحتضننى

مش عايزة اشرب

انتى مش بتكلى خالص عشان نقول اتعشيتى ونمتى فبجيلك كوابيس

انا شفت بابا

الله يرحمه

عايزة انام

قومى يا بنتى اقعدى كفاية نوم وكوابيس

عايزة انام

وافكر

ربما صرت اراه حزينا عاجزا عن مساعدتى لاننى الآن هكذا

تتكاثر المشكلات وينعدم الشعور بالأمان بكل اشكاله وصوره ونصبح فى حاجة الى العون او ربما معجزة تنتشلنا من ما صرنا موحلون به فى دنيا لا تعلم الا لغة واحدة

القوة

فان لم تكن على مستوى الحدث فلا داعى لوجودك

فقد

ارحل

ارحل بهدوء

صمت

noreply@blogger.com (ظل الشمس) — Wed, 21 May 2008 10:42:00 +0000

هى/ مالك؟

انا/ ماليش

بداخلى الم يعتصرنى اخبئه عنها

لا تحتمل هى رؤيتى هكذا فاحمل حالى الى غرفتى واكوم نفسى بداخلها ثم اعيد ترتيبها امام الكمبيوتر علّنى اتناسى قليلا

هو/ مالك

أنا / مخنوقة

هو / فيه ايه

أنا /مفيش عادى ضغط المذاكرة

هو / احنا اتفقنا مش نخبى

أنا / مقدرش اخبى

وكلام كثير

واصبح افضل وافضل

ثم تهاجمنى الهموم مرة اخرى

ولكنى الآن لا اعرف ان سألنى هو كيف سأجيب

هو / مش تقولى كدا عشان انتى عارفة انى سلفى

انا /أنا مش اعرف انك سلفى انت مش قلت كدا

هو / متقوليش مسلم زيك قولى مسلم زيى

أنا / ثانك يو :)

يتهموك احيانا بالجنون

بالتضليل

بأى شىء

ولكن حينما بفعلها اقربهم اليك ويتهمك بالكذب والنفاق بل ويشكك فى اشياء عدة فتكون هذه موجعة بشكل لا استطيع وصفه

نبكى فيبلل الدمع وجناتنا ونحن نكتب فتظهر كلماتنا مشبعة بالدموع تكاد تتشقق من فرط تشبعها بالماء وكأننا نتعمد اغراقها فى مهدها بلا ذنب او جريمة

وحينها

يكون الصمت

أفضل

^_^

نبضات

noreply@blogger.com (ظل الشمس) — Sat, 17 May 2008 12:32:00 +0000

احيانا تكون فترات طويلة تمتد ربما لسنوات ولكنها ليست ذات جدوى او فائدة, او بمعنى اصح لا تحمل مواقف فارقة او قرارات مصيرية

واحيانا تكون شهور وربما ايام ولكنها كفيلة بتغيير مسارات عدة فى امورة ومجالات ونواحٍ عدة

******

قد يمحو عذاب السنين انسان ولكنه ان غاب فلن يبقى بعده الا الام السنين الماضية والحالية والآتية

*****

من الصعب ان نأخذ قرارات بعكس ارادتنا ومن الاصعب ان نتحمل تبعاتها ولكنه المستحيل حينما نفكر فى التراجع عنها

*****

قد يؤلمنا صديق ..وقد ينسانا صديق..ولكننا طيلة الوقت لا نلقى بالا لمن لم يؤلمنا او ينسانا بعد

*****

اليتم : فراق لاحد الابوين يتخلله حاجتنا اليهم كى نكمل حياتنا

الفراق : يتم يتخلله مرارة وخيبة امل من وجد نورا فى ظلام دامس ثم انقشع فجأة

*********

اسكندرية ماريا وترابها زعفران

noreply@blogger.com (ظل الشمس) — Sat, 03 May 2008 17:55:00 +0000

طبعا مليون فيلم واغنية ومسلسل واعلان وكل حاجة اتعملت عن عروسة البحر الابيض والاحمر وكل البحور وكل الدنيا العروسة اسكندرية

مش باقول كدا لانى اسكندرانية حتى النخاع بس

انا باقول كدا لان البلد دى بيعشقها الاسكندرانى واللى مش ,صحيح احنا بنحبها بزيادة وبنموتوا فيها بشكل لا يوصف بس اسكندرية من قديم الازل وهى اجمل وارقى واحسن مصيف لاى حد فى مصر ,بيفضل الولد يذاكر طول السنة والرجل يشتغل طول السنة والست تشقى فى البيت طول السنة عشان فى الاخر هايروحوا يقضوا شهر فى جنتها وعلى شطها ورملها وبحرها وشوارعها اللى زى الفل

اسكندرية بالنسبة لناس كتير اوى مش بس مصيف هى كمان مكان لذكريات جميلة ومرتبطة باحداث فارقة جدا فى حياتهم يعنى هى بلد المصيف وبحرها بيغسل هموم الشقيانين طول السنة وكمان معظم الناس بتقضى فيها شهر العسل بتاعها ودا بيخلي اسكندرية مرتبطة مع ناس كتير باجمل ايام العمر

كمان الجزيرة اللى اتربطت بقرية وبتطل على اجمل فيو للبحر المتوسط مش بس الذكريات فيها على الشط والبحر

كمان شوارعها من القلعة والانفوشى لحد ابو قير مرورا بقى بالمعمورة والمنتزه ولوران وستانلى وسان ستيفانو وزيزينبا وجليم ومعاك طبعا المنشية ومحطة الرمل والسلسلة وكل مكان فيه ريحة البحر ووشوش البحراوية بصفائها ونقائها وجمال البحر اللى مديها منه حتة

كل دا كوم وارتباط الناس باسامى مطاعم هنا زى حسنى وقدورة ومحمد احمد واسامى محلات زى عزة وغيرها وكل الاماكن دى بتقدم انواع اكل على اختلاف اشكالها هى بتستمد جمالها وروعتها اللى متتنسيش من جمال وروعة المكان والجو والوشوش اللى بتقدمهالك

كل دا كانت مقدمة سرحت انا فيها ولو هاسيب نفسى هانتكلم للصبح

عايزة من البوست دا اقول ان خوفى فى الوقت دا واكتئابى بيزيد بشكل ملحوظ ودا بيحصلى كل سنة

لان اسكندرية بتاعتى الجميلة المصونة بتتهان وتتبهدل طول شهور الصيف

هجمات مصيفين من الاقاليم بشكل وحشى بيبهدلوا فى البلد كأنها والعياذ بالله قوات غزو جاية تقضى على بلد كفار مثلا!!!!!!!!

البلد بنتنهك بشكل مبالغ فيه وياريتها بتيجى على قد الزحمة وبس لكن تخريب المرافق وتلويث البحر وبهدلة الشوارع والزبالة اللى بتترمى فى نص الطرق الرئيسية بجد حاجة تقرف

انا باستعد دلوقتى لحبسة طويلة اوى فى البيت هاتمتد طول شهور الصيف لانى لا هاستحمل الزحمة ولا هاستحمل بردو اشوف بلدى وهى بتنتهك باسم السياحة الداخلية

ربنا يصبرنا ويعدى الشهور دى على خير

اليك

noreply@blogger.com (ظل الشمس) — Wed, 09 Apr 2008 21:47:00 +0000

اتعرف كم اشتقت ان اكتب اليك؟

اتعرف كم انتظرت كى اكتب اليك؟

اتعرف كيف صرت انا جراء فراقى لك

اتعرف كم لبثت مخبئة بين طيات نفسى اخشى الغوص بذكريات مدادها انت؟

والان قررت ان اكتب

اليك وحدك ولا احد الا انت

بصمت طويل نظرت الى صفحاتى فوجدتها بيضاء مرصعة بزخارف سوداء تشكل جماجم بشرية مميتة ,تسائلت ان كان ذلك ما يزينها ام هو ملطخها فلم اجد جوايا شافيا ,بل انى حتى لم اجد اى جواب على الاطلاق

تذكرت حينها كم كنت عطوفا حينما اخبرتنى عن الحدائق الواسعة والانهار العذبة والاشجار التى تزينها

ترى اتشبه هذه تلك ؟

انتظر

فقد تذكرت ايضا بسماتك ناصحا اياى ان اكف عن التصرف كالصغار حين اريدك تلبية احد طلباتى التى لا تنتهى فقد كنت باقيا بحياتى تزينها كتلك الاشجار المرصعة على الجانبين بحديقة ممتده يتخللها انهار لا تمل الطيور من زيارتها والارتواء بها

تذكرتك يا ابى وانا التى لا تنسى همسة همست بها اليها

مشتاقة انا اليك منذ ان كنت هنا

تلاطفنى كقطة تذوب فيك لعبا وعبثا ودلالً لا يوقفها الا صرخة" كــفى" التى تسكتها لدقائق ثم تعود اليك لتبقى بقرب من لا تعرف فى الدنيا من البشر امنا ولا فرحا الا فى جواره وبمعيته

سألتك يومها ولم تشأ ان تعكر صفو ذهنى الصغير بهذه الاوجاع

سألتك يا ابى فقلت انه لن يموت الا من انتهى عمره

سألتك ثانية فاخبرتنى ان الاعمار بيد الخالق وهو يعطى الكثير من عباده سبعون وربما ثمانون عاما

سألتك ثالثا فضحكت وعلمتنى ان القابض على زمام اموره ويحسب انها قد تستقر له هو كماسك جزءا من الهواء او يخبى بين كفيه شلالا من الماء

كنت تعلمنى بشىء من التورية ان لكل شىء نهاية ولكل منا فراق مهما طال به الامد

والآن يا ابى قد رحلت وتركتنى اشتاق اليك وانتظر منك زيارة فى حلمى وابتسامة يسعد به مساى ويضئ به نهارى

اتعرف يا ابى

اشبهك انا قلبا وقالبا

يسعدنى ان أ ُعلمك يا ابتى انه لازال بدنيانا نسخة منك ترتقب حلما يتحقق كى يسعد ايام الباقيين

لازلت اقولها مثلك "هونها بتهون يا زلمى"ولازالت امى تجيبنى كيفما كانت تجيبك "يا مهون يارب",انها ايضا تفتقدك , دائما تقول ان اخى هو قطعة منك بخلاف عصبيته وطيشه وجنونه احيانا ,دائما ما تصيح به بان اباك كان مضرب الامثال بالرزانة ودائما ما تتوعد بانها لن تتركه يصبح اقل شأنا من ابيه وبأنها لن تخذلك يا ابى وستكمل ما بدأته انت

هو ايضا يشتاق اليك كثيرا ويحتاج اليك اكثر

مثلى يا ابى

مثلنا كلنا

مثل كل من احبك وعرف قدرك

اتذكر حين كنت تبتاع لى اللعب لترانى اقفز فرحا وانقض عليك لاقبلك بعنف وكأنى امتلكت بلعبتى هذه ملك ما بين النهرين

ابتعت غير لعبك يا ابى ولكنها لا تملك ذلك المفعول السحرى فى قلب الدنيا رأسا على عقب وجعلى ملكة لها بمجرد امساكها بين يدى

بعد رحيلك فقدت الكثير والكثير من احلامى

وفقدت اكثر من بسماتى التى كنت مصدرا وحيدا لها

تقاذفتنى امواج لا تقل عنها شراسة تلك العقبات التى حالت دون ابقائى بلا اوجاع او كسور وشروخ غائرة لم يوصف لها دواءا حتى الان

لم اشأ طوال تلك السنوات ان ازعجك بشكواى رغم تمام علمى بأنك تشعر بى وبما حل ويحل بأمورى

ولكنى الان احتاج ان اشكو

احتاجك يا ابى

لم يعد هنا ما يبقينى بعيدة عنك

لم يبق من الالوان لونا ولا من الارض زرعا ولا حتى من البشر انسانا

اتسائل كثيرا ,متى القاك يا ابى لاقص اليك تفاصيل سنوات كنت فيها بمنأى عنى وكنت فيها بقرب منك حيث انت وحيث تكون

لقد صرت يا ابى قطة بائسة متخبئة داخل جلدها خشية انتزاعه منها بالقوة

صرت اخشى تنفس من حولى وضحكاتهم وهمساتهم وحتى نظراتهم

حسبى يا ابى وريقات مكتوبة بخط يديك

وصور انت فيها تنيرها وتحمل بين طياتها عبق ايام كنت فيها ملىء سمعى وبصرى ووجدانى والان يا ابى لم تعد سوى بوجدانى

اليك اكتب

واليك اكتب

واليك اشتاق

واليك بحاجة انا

اليك يا ابى

وسقط القناع..part 2

noreply@blogger.com (ظل الشمس) — Mon, 07 Apr 2008 14:37:00 +0000

الاخوان هايشاركوا فى انتخابات المحليات

طب ادينى عقلك بقى

الاخوان ميشتركوش فى الاعتصام وفى نفس الوقت وبالصدفة البحتة سبحان الله يشتركوا فى المحليات بعد صراعهم الطويل مع الحكومة فى الموضوع دا

كدا بقينا الحمد لله فاهمين ايه اللى بيحصل

مش هانسأل تانى ازاى ينتفضوا عشان غزة ويحشدوا قواتهم ومينتفضوش عشان مصر

كل الحكاية انهم كانوا بيقولوا للحكومة دى عينة من اللى هايحصل لو اشتركنا فى اى اضراب

وطبعا الحكومة مكدبتش خبر فاوضتهم على الكراسى اللى هما عايزينها ومش بيعوزوا غيرها وطبعا هما وافقوا وادوا اوردر ان مفيش حد اخوانى هايعتصم

الكارثة بقى ان الاخوان وشباب الاخوان اللى بيقولوا انهم على قدر من النضج والعقلانية عدى دا على عقولهم النابغة ومعلقوش وقالوا سمعا وطاعة كالعادة

اتفاقات شراكة مع الحكومة ولعب تحت الترابيزة وكل دا وعادى المهم كرسى المجلس حتى لو مجلس محلى

ماهو الحكاية مع الحكومة بقت تبادل مصالح ونظام شد وارخى واللى يتجوز امى اقوله يا عمى على رأى المثل المصرى المشهور

وزى ما قلت قبل كدا ان مش هايكون فيه ذرة ثقة فى الاخوان او غيرهم لانهم ميفرقوش حاجة عن اى فاسد او صاحب ذمة خربه

فببساطة يا سادة كرسى فى مجلس محلى عند الاخوان اغلى واهم واقيّم من رغيف عيش لابو العيال المطحون او غطى لعيلة بتموت من البرد بس ازاى تدفى وهى بتتقطع بين حكومة فاسدة ومعارضة اكثر فسادا

للمرة التانية باسحب اى احترام كان ليهم فى يوم من الايام لانهم لا يستحقوه

وسلملى بقى على القوة الوطنية الحاشدة لمواجهة الفساد والاستبداد

وسقط القناع

noreply@blogger.com (ظل الشمس) — Sun, 06 Apr 2008 20:53:00 +0000

النهاردة مصر كانت ناوية تضرب وبعدين رجعت فى كلامها

او بالاحرى طبقت مبدأ من خاف سلم

مش عارفة اوصف اللى حصل النهاردة بالظبط

يمكن هاعرف اوصفه بعدين لما اجى احكيه لاولادى ,بس كل اللى اعرفه ان النهاردة كان يوم بجد مختلف وفيه مفاجآت كبيرة جدا

النهاردة يا جماعة صحينا على هدوء نسبى فى الشوارع

المدارس فاضية ودا لان الاهالى خافوا على اولادهم

الجامعات شرحه الا اللى كان عندهم امتحانات

المواصلات بشكل عام كانت قليلة والحكومة بذات نفسها ممثلة فى شرطة المرور هى اللى كانت بتجبر اصحاب الميكروباص على انهم يركبوا الناس ويودوهم ودا شافته صحبيتى وهى رايحة الميد تيرم بتاعها فى ميدان ا لساعة فى اسكندرية

كمان حصل وقائع تكسير محلات فى اماكن كتير ودا طبعا مش غريب لان الناس من غير اضراب او غيره الاسعار وضيق الحال خلاها مشكوك فى قواها العقلية للاسف

الشوارع كانت فاضية نسبيا بس البيع والشرا كان عادى بعد الظهر مع ان الاضراب عموما كان معمول عن البيع والشرا

طبعا المصالح الحكومية كلها كانت كامل العدد النهاردة ودا بسبب ان الحكومة هددت الموظفين بسلخ جلدهم عن عضمهم فى حال غيابهم

باختصار اليوم النهاردة كان شبه اجازة لفئات معينة والعاصفة الترابية استخدمتها المعارضة عشان ترمى عليها فشل الاضراب بالكامل واستخدمتهاا لحكومة عشان تبرر غياب الطلبة

اليوم عدى بسلام وجه عكس كل التوقعات

المفاجأة النهاردة كانت فى موقف الاخوان المسلمين

الاخوان موقفهم كان سلبى ولم يشاركوا فى اى اضراب اقصد طبعا الموقف الرسمى للاخوان

طبعا معروف للجميع ان الاخوان بيتميزوا بالتنظيم وحشد القوات وقت ما يحبوا ودا اخر حاجة كانت ظاهرة ايام مظاهرات التضامن مع غزة الايام اللى فاتت , الغريبة انهم محشدوش قواتهم تضامنا مع المصريين!

!!!!!!!! مش فاهمة ليه

كل اللى اعرفه انها هاتفضل وصمة عار فى جبينهم واظن بعد كدا اتعرف مين هما الاخوان وانهم مبيتحركوش خطوة ولا بيقولوا كلمة الا عشان مصلحة الاخوان وبس اما المصريين فنروح فى اقرب حفرة وندفن نفسنا فيها مش مهم المهم

المصلحة العليا للجماعة المبجلة

الغريب ان عصام العريان لما اتسأل على الجزيرة فى برنامج ما وراء الخبر قال انه متضامن مع الاضراب وانه يتعاطف معاه وان الجماعة سابت الخيار لافرادها بالمشاركة او عدمها

انا عن نفسى لو كان جوايا ذرة تعاطف مع الاخوان او قادتهم او حتى ذرة اعجاب بحماسهم فانا دلوقتى باسحبه وباقول

بعلو صوتى

"ان الاخوان والحزب الوطنى وجهان لعملة واحدة"

الاتنين معندهومش مانع يدوسوا علينا عشان مصلحتهم

الجميل فى كل دا ان مفيش 10 اخوان اتجمعوا وعملوا مظاهرة او اعتصام عشان اى حاجة واول كلمة بتتقال فى اى حوار معاهم افرجوا عن المعتقلين الاخوان فى السجون

ياريت الناس تفهم ان اى حد تم اعتقاله من الاخوان كان لصالح الجماعة وان انتماءه الاول والاخير للجماعة مش لمصر ولا المصريين

يعنى انتفضتوا عشان غزة وحصارها والتجويع اللى فيها وحصار المصريين الاقتصادى وتجويعهم وموتهم فى طو ابير العيش مهزكوش

اوك

اعرف صاحبك وعلم عليه

واظن مصر النهاردة علمت على ولادها اللى بجد

ولادها اللى هما لا اخوان ولا وطنى ولا تجمع ولا كفاية

ولادها اللى قعدوا فى البيت وكلهم امل ان قعادهم يغير اى حاجة ولو بسيطة

ولادها اللى احتاروا بين حكومة بتنهب قوتهم وتهدد امنهم ومش بيهمها غير امنها وامن حكمها وبين جبهة معارضة كل همها توصل لكرسى الحكم ويوم ما هاتوصل مش هاتكون اقل شراسة ولا خطر علينا من اللى موجودين دلوقتى

والله يا جماعة انا تعبت فعلا وحالتى قربت يبقى ميئوس منها

فعلا جالى اكتئاب من اللى حصل النهاردة ودا من الاحباط اللى حصل لكل حد كان متخيل ان النهاردة كن ممكن يكون بداية تغيير

فى كل الاحوال لينا ربنا

والحمد لله على كل حال

فلسفة الاضراب

noreply@blogger.com (ظل الشمس) — Sun, 06 Apr 2008 00:31:00 +0000

6 ابريل

_____________

انا مضربة

طبعا موضوع الاضراب دا قتل كلاما ونقاشا وكل واحد قال بما يكفى انه هايضرب ليه وازاى وعشان ايه

لكن حقيقى فكرة اننا نوصل لدرجة الغليان دا فى الاسعار ولسة مفيش حد خد بعضه وقال لاء كفاية او عيب او حرام يبقى احنا فينا حاجة غلط بجد

انا مضربة

وان شاء الله بكرة هاكتب عن اول اضراب فى حياتى وبالمرة ابقى احكيلكوا عن اول اعتصام حضرته فى حياتى

ويارب اى حاجة تتغير

عن نائب البرلمان الهولندى والفيلم المسىء للقرآن اتحدث....

noreply@blogger.com (ظل الشمس) — Sat, 29 Mar 2008 22:54:00 +0000

I do not know the person who am writing for,but whatever the person who is reading now please stop all that smuttiness which is represented in that film .the man who wasted his time and his money of slanging arab people by insulting their religion and their book ,is just a reason for a new hostility between two cultures, the idea is not two languages or two civilizations or even between two religions, it is the idea of generalization, the limited point of view which judge the whole religion by individual acts of some mad people, i think that is injustice .I am a muslim arab girl and i refuse all what is happening i cannot accept the smuttiness and i gently ask you acting as a civilized country and prevent more hostility and more hatefulness especially that you can prevent it in its start .I ask you of the name of all peace lover of that world, Please stop this injustice

بحبك يا زوزّا

noreply@blogger.com (ظل الشمس) — Sun, 23 Mar 2008 21:55:00 +0000

الحقيقة من زمان اوى وانا حاسة ان فيه حاجة معينة ناحيته

بس النهاردة اتأكدت

انا بحبه اوى

زوزّا بتشديد الزين التانية دى دلع زياد

اه حبيبى وبادلعه لو مش هادلع حبيبى هادلع مين يعنى

هاحكيلكوا اتقابلنا ازاى

مامته اتصلت بيا قالتلى لو سمحتى انا محتاجاكى تساعدى ابنى

وطبعا متأخرتش

وطبعا وانا باساعده اتعلقت بيه جدا

وبعدين اصل هو كمان طيب ومؤدب ومحترم جدا

كل دا صحيح انا مقولتلكوش ايه طبيعة المساعدة

الحقيقة انا كنت باذاكرله انجليش عشان هو فى لغات وصعب عليه اوى ومامته مش قادرة عليه

ايه دا شايفة ناس اتخضت

انتوا كنتوا فاكرين ايه؟

يا نهاركوا ابيض

لا لا مخكواا ميروحش لبعيد

زياد فى تالتة ابتدائى

المهم فضلت شهور بذاكرله وشغالة معاه بنظام المكأفآت

انا عارفة ان بينى وبين الاطفال ود والفة وحب من اول نظرة

بس مع زوزا الامر مختلف

زوزّا شرس بطبعه

ومستحيل حد يعرف يرضيه

ومامته دايما تشتكى من انه ممكن ينضرب برا وميجيش يقولها ولا يشتكيلها

شهور عدت عليا انا وزوزة وبعد ما كان بيكره الانجليش بقى يستنى اليومين اللى باذاكرله فيهم

فرحت وقلت الحمد لله الواد حب المادة

بس اكتشفت النهاردة حاجة تانية

انا كان بقالى اسبوع مشغولة ومش قدرت انى اقعد معاه خالص

وكان الحوار دا

انا :ازيك يا كابتن عامل ايه

هو:كويس

انا:ومالها من غير نفس كدا ليه شكلك اتعودت على الدلع بقالى اسبوع مريحاك

هو:وانتى بقالك اسبوع معبرتينيش ليه بقى

انا:والله كنت مشغولة اوى

هو:كان عندك ايه يعنى

انا:كنت مشغولة يا زوزّا

هو:مشغولة بايه طب

انا:مشغولة بقى فيه ايه

هو:طيب

انا:يا سلام على التكشيرة يا سلام

مامته تدخل تقاطعنا وبعد السلامات والكلام وشوية رغى

هى:هو زعلان منك

انا:ليه

هى:عشان طنشتيه , انا جبتله هدايا عيد الام للمدرسات بتوعه وقالى انه هايجيبلك هدية قلتله هى لسة صغيرة قالى لاء ماليش دعوة وأصر ان هو اللى ينزل ينقيهالك

انا وقتها قلبى كان هاينخلع منى من كتر الفرحة

زوزّا طلع بيحبنى انا وعشان كدا حب الانجليش

ينفع حد فى الدنيا يفرح زى ما انا فرحانة

اظن انى تعديت المسموح بيه بجد فعلا عمرى ما فرحت كدا

اد كدا الحب من غير مصلحة او هدف بيبقى جميل

الاجمل من دا كله ان زياد نزل مع مامته عشان يجيبلى الهدية وفضل و اقف فى المحل ساعة زة ما قالت مامته وفضل يوريلها كل حاجة ويقولها اجيبلها دى ولا لاء

لحد فى الاخر ما مسك عقد وقالها انا شوفتها بتلبس زى دا وجابلى العقد

العقد اللى هافضل طول عمرى احبه واشوفه اغلى من اى حاجة تانية حتى لو كانت ماس وبجد والله من غير مبالغة

العقد اللى علمنى يعنى ايه الدنيا فيها حب نضيف ونقى من غير اى مواد حافظة او اضافات

جاتلى هدية عيد ام يا حلولى يا حلولى

انا فرحااااااااااااااااااااااااااااااانة

انا راجعت يا رجالة

noreply@blogger.com (ظل الشمس) — Thu, 20 Mar 2008 22:22:00 +0000

طبعا مقصدش رجالة حرفيا لان تاء التدوين فيهم زبونات ليا والحمد لله

صحيح انا مدونة على قدى خالص وباشتغل فى مربع صغير واكيد منيش برايد او اخف دم او مالك مصطفى عشان اما

اغيب كل الناس تقلب الدنيا وتدور فى المدونات تدور عليا بميكريفون

بس اوك

كفاية عليا اللى سألوا

كفاية عليا سؤال الاستاذ وطمطم ومالك ومستر فوكس ومش عايزة انسى حد

بس الاجمل فى كل دا ان بجد البلوج وحشتنى اوى اوى

وحشنى الزعيق فيها وانى اكتب كلام كتير ومستفز احيانا وافضل انتع فى قلبى وانا عارفة ان التغيير صعب بس باتكلم بصوت ايوب اللى جوايا

الجميل كمان ان الغياب كان بسبب ان النت كان قاطع

انتوا مش ناس غريبة احنا بيننا عيش وبوستات

انا باعيش فى بيت يا سادة فيه مأساة بكل ما تحويه الكلمة من معنى

ايوا فعلا

ياريت تخلى بالكوا من اللى هاقوله وتعتبروا نفسكوا عبد الوهاب مطاوع فى بريد الجمعة وتحاولوا تحلولى مشكلتى العويصة الخطيرة اللى بتؤرقنى بالليل وبتنكد عليا بالنهار وبتجيبلى حساسية بعد المغرب

انا الحقيقة باعيش فى البيت مع

مع

مع اخ

فى ثانوية عامة

لا ومش بس كدا

دا فى تالتة

والادهى والامر

انه جايب 76 فى المية فى تانية بالصلاة على النبى

مش باقولكوا مأساة

عاااااااااااااااااااااااااا

بصوا البيت متكهرب

اخوكى بيذاكر

اخوكى عنده ثانوية عامة

اخوكى لازم يدخل كلية كويسة

طب يا اخوانا انا خلصت الثانوية العامة وربنا كرمنى ودخلت الحرم الجامعى والحمد لله

مفيش فايدة

يا جماعة يهديكوا يرضيكوا يخليكوا يكرمكوا بجورج قرداحى يكسبكوا المليون

مفيش

تقولشى بادن فى مالطة وسيشل وبالى

المهم قالوا لازم نهيأ الجو لاخوكى

قلنا اوكى

بعد ما كبل النت اتقطع فى البحر يا اخوانا جات دى القشة التى قصمت ظهر المعزة

لاقيت القائد الاعلى ووزير المالية والدفاع والانتاج الحربى(سيبكوا من الانتاج الحربى دى)(المهم لاقيت صاحب المناصب دى كلها فى بيتنا المصون بيقرر يحاصرنا اقتصاديا ويمنع فلوس اشتراك النت بحجة المحافظة على الامن القومى الداخلى والمتمثل فى الوصول باخويا صاحب الثانوية العامة لبر الامان

رضخنا للامر الواقع

وحاولت اعود الى عصر ما قبل النت

واتكيف مع الواقع المرير دا

واعيش بشىء من الاستقلالية بعيد عن النت بشاته ومنتدياته وايميلاته وبلوجاته

حاولت

قاومت

صمدت

صبرت

لحد ما يوم قررت انى اشوف من بعيد يا ترى ايه الاخبار

روحت بمنتهى الشجاعة والبسالة والاستبسال(محدش يسألنى الفرق بين بسالة واستبسال بلاش احراج)

المهم قررت انى اروح المكتبة افتح النت منها واشوف ايه الاخبار

وفعلا

روحت

ويالهول ما رأيت

المنتدى اللى انا مشرفة فيه قفل

والبلوج فيه عدد زوار بسم الله ما شاء الله وصل لمية وتسعين نفر ونفراية تقريب

وكمان ناس بتسأل عنى

روحت البيت قلت لاء

والف لاء

قررت اقوم بالثورة

بس قلت يا بت يا ظل عيب

خليكى فى المفاوضات الاول يعنى هى جات عليا انا ومش هاتفاوض

ماهو الاخوة العرب بقالهم 70 سنة بيتفاوضوا ومش ناويين يبطلوا حتى لو احتفلنا بمئوية التفاوض

وبعدين بينى وبينكوا قلت بردو احنا مش بنتكلم مع حد هين

-احنا بردو قدام قوى عظمى-اه عظمى هو فيه اعظم من الام بردو؟

بس

وبدأت المفاوضات بمنتهى القوة والصرامة وباحساس داخلى نابع من اعماق الاعماق اننا بنتكلم فى حق مشروع جدا جدا

روحت بمنتهى القوة والصرامة دى كلها دخلت على ماما وهى بتعمل الملوخية

وكان الحوار دا

انا: ماما انا عايزة اكلمك فى موضوع

ماما وهى ماسكة مخرطة الملوخية : خير اللهم اجعله خير

انا بكل قوة: ماما الهى يكرمك ويخليهوملك رجعيلى النت انا زاهقت

ماما :مش قلنا اخوكى بيذاكر

انا:يا مامتى هو قاعد بيلعب على الكمبيوتر دلوقتى اساسا

ماما:مش كنا مسحنا الالعاب

انا:لاء ماهو بيلعب كوتشينة ودى مع الويندوز

ماما:طب امسحى الويندوز

انا:طب ما نمسحه هو شخصيا عشان ميلاقيش نفسه وميلعبش

ماما:عايزة ايه

انا:النت ..بس النت يا مامتى

ماما:طيب بس اعملى الكمبيوتر بباس وورد

انا :حاضر

عونيا

هاه بقى

ماما:طيب اوكى خلى اخوكى يروح يدفع الاشتراك

وهكذا بكل بسالة وقوة ونخوة وعزة وكرامة وشجاعه زى ما لاحظتوا فى حوارى مع ماما استرددنا حقنا المسلوب بعد ما دافعنا عنه بكل قوة

طبعا النت موجود من امبارح هاتقولولى ليه منزلتيش بوست من امبارح-على اساس ان كل الناس بتعد الايام لحد ما انزل بوست يعنى -

اقولكم بمنتهى البساطة والسهولة والليونة

اصل اخويا كان موجود على النت

^_^

لوران على مفرق المفارق

noreply@blogger.com (ظل الشمس) — Tue, 08 Jan 2008 01:21:00 +0000

سلام عليكم

طبعا لاننا تخصص مشاكل وكوارث

فالعيد دا صاحينا على كارثة لوران

عمارة كبيرة وضخمة

وفى مكان جميل انا بحبه جدا

فجأة وقعت باللى فيها ومات فيها كتير

واللى يعرفه اهل البلد بس هو ان حصلت حوادث نهب وسرقة كتير وان الحكومة كانت بتتعامل مع الموضوع بمنتهى

-البرود-اقصد بالحكومة البوليس يعنى

انا بودانى سامعت ظابط بيتكلم عن ان حرامى سرق شوية حاجات الصبح ورجع يكمل بعد الظهر

والرجل صاحب

الحاجات اللى اتسرقت زعلان

وطبعا كان تعليق الظابط على الموضوع"مش يحمد ربنا انه لسة عايش؟"

دا غير بقى الشىء اللى اسمه الاستنطاع

الاسعاف بتتعامل مع الجرحى وهيئة الدفاع المدنى بتتعامل مع الانقاض على انهم رايحين فسحة

وناس بتطلع احياء وناس ماتت تحت الانقاض وكانوا احياء

بصوا يا جماعة انا مش هاتكلم النهاردة عن جزيرة الاسمنت اللى اسمها مجازا اسكندرية

ولا على حياة الابراج اللى احنا عايشينه

ولاعن الاسمنت المغشوش والحديد المصدى و التربة الجيرية والمياه الجوفية وكل الحاجات دى

ولاعن التراخيص الى بتطلع فى نص ساعة بمجرد ما يبقى فيه كاش على الترابيزة

ولاحتى عن صاحبة العمارة اللى دايما بتبقى فى دبى سبحان الله

انا بس عايزة افهم

هو احنا ليه الحكومة بتتعامل معانا فى الكوارث بالاستهتار داوكأن لسان حالهم بيقول احسن تستاهلو

ليه بتسيب الناس تموت قبل وبعد الحادثة

لا بتساعدهم عشان الكارثة متحصلش ولا بيحاولوا يعالجوهم بعد الحادثة؟

ايام اعصار كاترينا بوش كان هايقال لانه متهم بالتراخى فى التعامل مع ضحايا كاترينا

ودا اعصار حاجة من عند ربنا مالهومش دخل فيها يعنى

ودى كمان امريكا اللى الطيارات الهليكوبتر بتبقى فوق مكان الحادثة بعد دقيقتين وربع

يا جماعة لو حد عنده اجابة للسؤال دا يقولى

عموما

انا حاولت اجاوب لاقيت ان الاغرب هو رد فعلنا احنا كمان تجاه الكوارث مش بس الحكومة

احنا كمان ساكتين

وبعد تفكير جه عا بالى انه ممكن يكون دا سببه حاجة لخصتها فى نظريتى اللى سميتها

نظرية تكيف المواطن المصرى مع الكوارث

بتقول النظرية دى اننا كمصريين بنمر ب5مراحل فى تقبل الصدمة او الكارثة

مرحلة الاندهاش والرفض

بعد سماع الخبر مباشرة

واعراضها اتساع الفم على مصراعية وتبريق العينين والسكوووووت المندهش

ومنبقاش عارفين نستوعب اللى بيحصل

مرحلة الغضب

دى بتكون اعراضها احمرار الودان وخروج دخان منها احيانا

وفيها بنبتدى نغضب ونثور ونزعق ونتوعد للى بيحصل ونرفض الكارثة دى ونتوعد فى حال تكرارها

مرحلة الملل

دى اعراضها اكتئاب وكره لنشرات الاخبار

نبتدى نزهق نفسيا من كتر ما الكوارث ومن كتر ما اننا مش عارفين نعمل حاجة ومن كتر قلة حيلتنا تجاه الكارثة

مرحلة التعود

ودى بنكون فيها وصلنا لنوع من السلام النفسى مع الكارثة وبيبقى عندنا نوع غريب من تقبلها والتسليم ليها بل والتعامل معاها على انها جزء من اجزاء حياتنا

مرحلة التبلد

متزعلش اوى كدا

هاثبتلك انه تبلد

زمان كنا نشوف طفل بيموت فى التليفزيون او طفل بيشحت فى الشارع نزعل وندايق ويمكن نبكى

دلوقتى ممكن حضرتك تبقى بتتعشى والتليفزيون مفتوح وحضرتك ماسك الشوكة بتستعد لالتهام طبق مكرونة اذ تفوجىء بطفل مقتول فى التليفزيون

تقول يا حرااااااااام

وتكمل رحلتك مع الشوكة والمكرونة عااااااااااااادى جدا

وكل دا بيؤدى فى الاخر الى التكيف التاااااااااااام مع الكارثة

عشان كدا ممكن اقولها وبكل ثقة

اننا شعب متكيف

تقدر تقولى حضرتك اتكيفت ولا لسة؟

ولو لسة حضرتك- بفتح التاء وكسرها -فى انهى مرحلة بالظبط؟

^_^

2008

noreply@blogger.com (ظل الشمس) — Mon, 31 Dec 2007 17:36:00 +0000

كل سنة بتواجهنى نفس المشكلة

ازاى هافتكر اكتب رقم السنة الجديدة فى التاريخ ومش هاتلخبط واكتب الرقم القديم

كل بداية سنة كمان بتفكرنى ان سنة من عمرى راحت

وياترى السنة اللى راحت كانت محسوبالى ولا محسوبة عليا

يمكن بافكر كدا لانى من مواليد يناير فبداية سنة جديدة لكل الناس هى بداية سنة من

عمرى كمان

ويمكن لانى باخاف من التغيير وباخد وقت على ما اتقبله

ويمكن لان التغيير دايما مربوط بالنسبالى بكل الحاجات اللى قلبت حياتى رأسا على عقب

زى ما بيقولوا

بس فى كل الاحوال

كل سنة وانتوا طيبين

مدونين كتير بيكتبوا عن السنة الجديدة

كل واحد شايفها ازاى

وكل واحد شاف السنة اللى قبلها ازاى

يمكن انا مكملتش سنة هنا فى ظل الشمس

بس انا ارتبطت بيها اوى لدرجة انى بقيت باجر كل المشاكل والهموم واجى هنا ارميها

واقعد اشوف هاوصل بيها لفين

وكعادتى

جيت هنا واحنا على اعتاب سنة جديدة

وهاسيب هنا شوية كلمات باقولها لاقرب حد ليا على الاطلاق

هاقول لربنا اللى مفيش اقرب ولا احن ولا ارحم منه

يارب

لو كانت السنة اللى فاتت تعب لناس او سببت وجع ليهم فخلى السنة دى بداية راحتهم

وسعادتهم يارب

يارب

لو كانت السنة اللى فاتت فيها عذاب وشقاء لحد فخليها السنة دى نهاية العذاب دا يارب

يارب

لو كانت السنين اللى فاتت كلها رمز لضلال ناس او معصيتهم فاجعل السنة دى بداية

هدايتهم وقربهم منك يارب

يارب

فيه واحدة من عبادك الدنيا تعبتها اوى وانت عالم ازاى

شكوتها ليك انت من كل حاجة واى حاجة انت عالم ازاى اثرت على حياتها

هى يارب واقفة على بابك مستنية سنة جديدة

مستنية نهاية لكل حاجة وجعتها ولسة بتوجعها

مستنية بداية لرحمة انت اهل ليها يارب

وعفو مش غريب عليك

وكرم مصدره انت يا كريم

يارب خلى 2007 و 1428 نهاية كل شر

وتكون2008 و1429 بداية كل الخير

ياااااااااارب

حققلنا احلامنا

ورينا بعيوننا الدنيا وهى بتتغير حوالينا فى صالحنا

ومتوريناش تانى احلام بتموت قدام عينينا واحنا مش عارفين نعمل لها حاجة

يارب

رحمتك وعفوك

وكل سنة وانتوا طيبين

الساعة الخامسة والعشرون

noreply@blogger.com (ظل الشمس) — Thu, 27 Dec 2007 00:48:00 +0000

جائتنى اسئلة ومطالبة انا بالرد عليها والاجابة الوافية الشافية وبلا تردد او انكار او اخفاء لحقائق او نصف حقائق

وهاهى الاسئلة مرفوقة بالاجابات

من أنت ؟وما الذي تفعله هنا ؟

عبث

أنا هو ذلك العبث الذى جعل منى شىء بلا هوية تذكرسوى بطاقة شخصية يقولون ان من فيها انا

وان جاز لشىء ان يعبر عن نفسه فأنا مخلوق يصحبه التيه اينما ذهب ويرمق المستحيل بشىء من الامل

فدائما ما تنكسر احلامه على صخرة الواقع

ولا اعلم تمام العلم ما الذى افعله هنا سوى انى اختبىء من عالم حقيقى فى داخل طيات عالم افتراضى جعل من حياتى هوة اليكترونية ليس فيها ما يسمن ولا يغنى

الا بعض تلك الاحاسيس الصادقة تجاه اخ اكبر لى

اطمع ان يظل اخى ولا تفرقنا قواعد الشبكة العنكبوتية

إسرائيل تقصف كل جنوب ممكن بحثا عنك ، أي شمال ستقصد ؟

سأظل بالجنوب

لن اقصد أى شمال

فلا اخاف قصف اسرائيل

ليس شجاعة وانما هوان النفس على النفس

لا اجد ما يصلح قوة دافعة لى لافر هاربة الى اى شىء يعصمنى من الموت

فالموت فى حد ذاته بالنسبة لمثلى رفاهية

أنت مكلف بحذف حرف من حروف اللغة العربية .. أيها ستختار ولماذا ؟ ..

سأحذف حرف الضاد (ض

ربما استطيع القضاء على ضعفى بالتبعية

او ضعف كل من حولى

او ضعف من ضعف امامى ليسيطر ضعفه على اضعف ما بنفسى

اكره ضعفى القابع بداخلى بل واصر على نكرانه وعدم الاعتراف به

ولكن فى الحقيقة

اكره الضاد

لو قدر لك أن تدخل السجن فما هي القضية التي تتمنى ان تدخل بها إليه؟

ومن قال اننا احرار

ومن قال اننا بلا قضايا

انا سجينة ماضى جعل منى عجوز فى التاسعة عشر من عمرها

ولكنى على يقين انهم حين يفتحون لى القفص لاخرج

سأظل كما أنا

فحينها سأكون فقدت القدرة على الطيران

..بالمناسبة.. منذ متى اكتشفت نفسك؟

بالمناسبة.......

من هى نفسى

انا لا اعرفها

فان كنت تقصد هذا الكيان البشرى الغامض فلا اكذبك قولا

انا لا اعرفه تمام المعرفة

علاقته به سطحية

ولا اظن احدا قادر على فك طلاسمه

اللهم الا بعض محاولات عبثية من هذا الكيان لاسترضائى ولكن هيهات

على مفترق طريق لافتاتان ، اليمنى تقول ( إلى حلمك ) واليسرى تقول : ( إلى مالم يحلم به بشر ) ، أي الطرق ستسلك ؟

ليس لمثلى احلام يستطيع مخلوق تحقيقها

ولا حتى تصور كينونته

افما بالك بتحقيقها

اما احلام البشر فلا تعنينى

سأختار السير طويلاطويلا جدا

نحن لا نعيش حياتنا بل نتعلم فيها كيف نعيش» ما تعليقك؟

نحن لا نعيش

ولا نتعلم

ولا نفعل الا ما يبقينا على قيد الحياة بحكم تلك الغريزة التى تبقينا حريصين على حياة لا نعرف لها لونا

بجملة واحدة فقط أكتب تعريفاً لكل كلمة من الكلمات التالية:

الوطن :وريد يجاور بقية اوردتى وشراينى ..يزاحمهم ليبقى ..واقنعه بالتنحى فلا يتنحى

الأم: ليس لها تعريف يستحق الكتابة بجوار اسمها..ستظل تتحدى اللغات ببلاغة تضحياتها,وسيظل عفوها يتحدى كل اساطير المحبة

الليل :عشق لا اعرف له سببا..وخوف لا اعرف له سببا..ونور ارتقبه وحينما يطل برأسه اتركه لأنام!

الحب :ضعف بقى بداخلنا ليكسرنا وقت اللزوم..ليس له مبرر ولا سبب ..انما وضع فى طريقنا ليعرقلنا ويزيد الامنا واحد

اأمريكا :كيان اقتصادى كبير يتربح من تجارة الموت فى كل مكان

المرأة :قالوا عنها الكثير من المدح والذم.. ولكنها بالنهاية...وكلهم على صواب

الصمت : انيسى حين يندر المؤنسون..وصديقى حين ينعدم الاصدقاء ..وبم انه لا انيس لى ولا صديق فالصمت هو كل ما لى

اليوم الوطني : يوم ينذر بان الهوة بيننا وبين كرامتنا قد زادت عام

!الإنترنت : ملاذى حينما اهرب من عالمى بكل قسوته لابنى مساحة افتراضية فى عالم افتراضى بصحبة شخصيات خيالية بأفكار حقيقية

اليوزرات :مخلوقات سلكية ولا سلكية تستجيب بالنبضات الاليكترونية ونادرا ما تجد بداخلها نبضات حقيقية

الشات: قدرة فائقة على تصنع المشاعر وتزييف الحقائق واخفاء الوقائع بشكل لا تجده فى اى مكان غيره....الا ما رحم ربى

المسنجر:بناية اليكترونية نلجأ اليها حين تخذلنا البنايات البشرية

من جديد كيف تتخيل العالم دون هذه الأشياء : ( القهوة .. الكمبيوتر ..نانسي عجرم .. أمريكا .. يوم الأربعاء ).؟

القهوة :لا أذكر يوما اننى احببتها او احتسيتها بهدف غير ابقائى مستيقظة لاتمام عمل ماولكن العالم سيفتقد رائحة ذكية

الكمبيوتر:سأفتقد كل ملفاتى..وسيفقد العالم ملفاته ايضاولكننا سنصنعها سويا من

.نانسى عجرم: ستخسر كوكاكولا الكثير!

أمريكا:سيغرق العالم فى انهار من الدموع...انها دموع اليهود الذين سيخسرون حينها اما حنونا لطالما سهرت لرعاية شئونهم

يوم الاربعاء:سيصبح الاسبوع اقل والشهور أقل والاعوام أقل وتتغير معالم الفصول الاربعة

أخترمنصباً واتخذ قرارا

سأكون المتحدث الرسمى باسم جياع العالم

كى اصرخ كما شئت وبشكل شرعى

وسأتخذ قرارا بالاعتصام أمام قصور الاغنياء

وان كلفنى ذلك الموت صراخا

قيس عنترة، جميل، هم الذين يقولون شعرا، وليلى وعبلة وعزة«صموت» لماذا هذا التغييب للمرأة؟

لا حاجة لها بالحديث

ولا حاجة لها باشعارهم

ولا حاجة لى بتصديق هذه المهاترات القائلة بوجود صراع بين الرجل والمرأة

فهو ليس صراعا

انه المنطق

هل تفضل ان تكون مطلوبا فى اى قضية على الا تكون مطلوبا مطلقا؟

لا اتفق مع هذه العبارة بالمرة

فأنا مطلوبة من قبل من حولى دائما وذلك لارتكابى جريمة الصمت

ولا اجد فى ان اكون محل اتهام او اهتمام فرق

كلاهما يكلف ما لا يطاق

أين تمضي كلمات الحب .. بعد أن نقولها؟

تمضى الى حيث مسواها الاخيرفضاء كونى فسيح ليس فيه من احد سوى بعض المهمشين الذين لازالوا يصدقون ان هناك من يصدقهم

فلا حب

ولا بغض

ولا غضب

بنحن نعيش فى عالم طمست ملامحه فصارت كالمادة اللاصقة

من يضغط عليها برفق تلصقه بها

ومن يضغط عليها بشدة تلتصق به

ومن يحاول تشكيلها فهو كمن يكتب

الماء او يحاول نحت الهواء

هل تجد علاقة بشكل أو بآخر بين المرأة وقطاع الطرق ؟

لا

فقاطع الطريق مجرم يفاجئك جرمه

والمرأة قاتلة تستنزف كل ما فيك ببطىء وبعلم مسبق منك

كيف هو غداً ؟

يوم بلا معنى

سيخيب فيه املى وينكسر فيه خاطرى وتقتل فيه احلامى بلا رحمة

ولكنى ذاهبة فيه الى ربى سيهدينِ ويرحمنى

قلق

noreply@blogger.com (ظل الشمس) — Sat, 15 Dec 2007 17:38:00 +0000

احد اعز اصدقائى مريض

ويجرى عملية اليوم

ادعوا له بالشفاء العاجل

ياااااااااااارب يقومك بالسلامة يا محمد

ياااااااااااااااااااااااارب

كسل

noreply@blogger.com (ظل الشمس) — Sun, 09 Dec 2007 22:10:00 +0000

أنا عارفة انى مهملة مع سبق الاصرار والترصد

وعارفة انى بقالى كتيييييييييييير منزلتش بوست جديد

بس هاحاول اتغلب على حالة اليأس المزمن دى واعمل اى حاجة فى حياتى

بافكر اذاكر

وانجح مثلا

اهو على سبيل التغيير

^_^

ادعوووووووووووووووووووووووووووووووووووووووووولى

يعنى ايه نقاطع المصرى اليوم يعنى؟

noreply@blogger.com (ظل الشمس) — Mon, 12 Nov 2007 23:18:00 +0000

صلى على النبى يا سيدى
لاء
وزيد النبى صلاة

طب وحد الله
وحده تانى يا سيدى

اشهد ان لا اله الا الله وان محمد رسول الله

انا قلت الشهادتين اهه
وهاقولكوا بعدين قلتهم ليه

كنت قاعدة على وشك انى اوقف عضو فى المنتدى بتاعى اذ افوجىء بميل جايلى مرتين
قلت درءا للملل اشوف مين عبرنى وبعتلى ميل
لاقيته من مدونة مظلومين
وبيقول فيها انى لازم اقاطع الصحيفة الصفرا
انا خدنى الفضول بصراحة
قلت هاشوف صورة روزا والبطل عبد الله كمال
او الاهرام
او الجمهورية

الاقى ان المطلوب اثباته هو المصرى اليوم
يا نهاركوا ابيض مخطط كاروهات فحلقى؟
مصرى اليوم نقاطعها
؟
مش ده الجورنال اللى نشر اعترفات المستشارة نهى الزينى يا جدعان؟
مش ده الجورنال اللى رئيس تحرير الرجل الرفيع اوى اللى اسمه مجدى الجلاد ده اللى بيخلى الاعتذار بتاع الخبر الغلط يتنشر فى نفس مكان وبونط الخبر نفسه
مش ده الجورنال اللى كان جايب صور البلطجة بتاعة الحزب الوطنى وشكل مصر وهو عامل شبه الثكنة العسكرية؟
الله

ده مفيش مصرى اليوم غيره يا جدعان
فتحت المدونة ظهرلى من الوهلة الاولى انها اخوان
قلت اوك
يبقى ممكن تكون المصرى اليوم بتحض على الرزيلة ولا حاجة
وبم ان الاخوان ملتزمين فقالو هانقاطعها

لاقيت بداية المقال الصورة دى

والحبيب المدون بيقول انها مش قضية اخوان دى قضية كل المدونين الشرفاء

وطلعت الحكاية ان المصرى اليوم يالوقاحتها

راحت بمنتهى البجاحة والصفاقة وقلة الذوق نشرت خبر عن انقسام جوا الاخوان وانشقاقات بين كوادر

الاخوان وشبابها

مش باقولكوا صفاقة!!!!!!!

طيب هو انا ممكن اقول حاجة حضرتك

من غير شخط يعنى

هو ايه يعنى لما المصرى اليوم تنشر اخبار كل يوم حتى عن الاخوان

هما مش جماعة وكيان نشط جوا مصر ؟

وايه يعنى لما يتقال ان فيه انشقاق جوا الجماعة؟

غلطنا فى الذات العليا لا سامح الله؟.

ولا قالوا هما فيه انشقاق بين جماعة مألفة من رسل وانبياء ومنزهين عن الاخطاء؟

مش بشر يا جماعة وارد يبقى فيه انشقاق او شوية ضغائن ؟

يعنى خلاف على علبة مناديل

خلاف على باكو لبان

بنى ادمبن بردو

طيب سيبك من اللى فات دا كله

اعتبرنى عيلة وغلطت

المصرى اليوم يا سيدى لفقت خبر

ملفقين الناس دى

ربنا يسامحهم بقى

عملتها ليه بقى حضرتك قضية رأى عااااااااااااااااااااااااااام؟

بقت قضية قومية بقى ولازم كل الشرفاء يقاطعوا المصرى اليوم عشان اتكلمت عن جماعتكم المصونة؟

انا مصرية

والاخوان جزء من مصر

بس مش مصر كلها

بدليل انى مصرية ومش اخوان

تحب تشوف الباسبور؟

يا شباب الاخوان ارحمونا

التمسك بالفكر والدفاع عنه حاجة

وفرضه على الاخرين حاجة

مصر هى مصر

مصر مش اخوان مسلمين

مصر مسلمين وغير مسلمين

وعشان انا عاملة حسابى من الاول
قلت الشهادتين خشية اتهامى بما لا يحمد عقباه

هاتقولى مكبراها

هاقولك ماهو اذا كان الجورنال المسكين مغفرلوش تاريخه ولا انجازاته واتقال عليه اصفر لمجرد خبر

معجبكوش

امال هايتقال عنى ايه

الاحتياط واجب بردو

وعموما

احب افكركم

الحكومة اللى مش عاجباكم تصرفاتها انتوا برد الفعل ده متفرقوش عنها كتير

هما كمان لما بيتهاجموا من جورنال

بيلونوه بالاصفر

مصر بالمقلوب

noreply@blogger.com (ظل الشمس) — Thu, 01 Nov 2007 22:49:00 +0000

مصر بالمقلوب

ويقولك:بنحسن معيشة الفرد
ده على اساس انها محتاجة تحسين؟.
يا بلد أنتى شاهدة على فقر الارض
وغلب البنات والشباب العاطلين
يا بلد أنتى شاهدة على ذل الارض
وهم العيال وشحططة المحترمين
يابلد وشاهدة على تعب الارض
ومر الستات والولاد الضايعين
ولو عايزين تحسين لمآساة الفرد
يبقى عايزين سبعين عيشة على دى المعيشة
لاجل ما ننتسمى بنى ادمين

ناديتها
يا بلد الاصالة
يا ارض الثورة
يا مهد الحضارة
يا منبع الثروة
يانور المنارة
يا أصل الجسارة

قالتلى:بتنادى يا بنتى؟
قلتلها :بنادى يا حاجة
قالتلى:كنت زمان ممكن ارد
دلوقتى خلاص غيروا اسمى
قلتلها:وانتى مين يا حاجة؟
قالتلى :انا؟
انا الغريبة
المريبة
انا اليتيمة
الوحيدة
انا.....
انا ام الغلابة يا بنتى

قلتلها:لاء يا حاجة
قالولى انك ام الدنيا
قالتلى:كنت
ايام ما كانت الدنيا دنيا
ايام ما كان الحق سيف على رقابنا
ايام ما كان الظلم كبوة
ايام ما كان الذل بلوة
ايام ما كان الاستعباد مصيبة
قبل ما يبقى الطبع هوان
والطبع غلاب يا بنتى

يا مصر طلعت معرفكيش
يا مصر طلعتى عنى غريبة
يا مصر اسمعى
بمنطقهم هما ... انا مبحبكيش
وبمنطقى انا ... انتى عندى غريبة

بحب اشوف ولادك على هواهم ماشيين
مش بهوى حاكم ملامحه قديمة
ماهوبردو هما معذورين
اصلهم من يوم ما اتولدوا فى حكمه عايشين
ولا غيره ولا غير ولاده علينا حاكمين

بحبك وانتى ارضك حرة
حرة بجد.مش بس كلام
لكن الحرية على ارضك النهاردة
مش اكتر من كلام

بحب اشوف بناتك قمرات بجد
ساعة الجد رجالة بشنبات
وساعة الدلع التفاح يظهر على الخد
والعيون لولى والشهد يشهد للقمرات

بس انا شايفاهم تلال هم
وخيال مآتة على أكوام حارات
قمر.بس أمر بالستر على الغم
وبكرة فى عيونهم زى امبارح اللى فات
وامبارح..ماشافوش فيه غير حلم
كسّره النهاردة ولا اعتى الفتوات

بحبك يا مصر بس بطريقتى انا
بحبك وهواكى حيرنى سنة
هو انتى ليه صعبة للواحد انه يفهمك؟
وليه مستحيله للواحد انه يقدرك؟

آآآه
طب افهمك ازاى؟
ما انتى ارض العروبة
وانتى بردو حليفة ولاد العم
وانتى مهد الحضارة
وانتى بلد قلالاة الدم
ما انتى ارض العزّة
والذل فيكى بقى سرطان
وانتى ارض الشمس
والضلمة بتسرى زى الرهوان

بلد مباركة صحيح
والعهد الجاى كله جمال
بيورثوها لبعض كأنها صفيح
والاسم شامخة ولا ليها مثال

أنتى سجنى يا بلدى
وسور السجن عالى يا بلدى
حاولت اهرب منك يا بلدى
عافرت ووصلت وخرجت يا بلدى
ورجعت تانى
بس
عشانك انتى يا بلدى
سجانك وسجانى على قلوبنا كابس
نقوله كفاية يقول ما انا عارف
البعيد جبلّة وبكرهنا مش حاسس
ولا باينله شايف وعامل نفسه مش شايف؟
اصل اللزقة اللى على الكرسى امريكانى
والظلم استحلى سكاتك وسكاتى
يا حاجة ماتيجى نزعّق ولو مرة بقى
يا عظيمة يلا وكفاية شقى
يعنى هى موتة ولا اكتر؟
ولا الحق فى الحياة اصبح اغلال؟
يعنى هى عيشة ولا اكتر؟
ولا كلمة الحق بقت فيكى محال؟
يا مصر مش مهم انتى صح ولا غلط
معدش يفيد
يا بلدنا مش مهم طيبة ولا لبط
مفيش تجديد
يا حاجة مش مهم فوق ولا تحت
مفيش فايدة
مفيش حاجة

يا مصر خنقونا بغناويكى
بضفاير ليل تغطى على بلاويكى
قولة الآه محبوسة فى مواويلك
وذلة هوى محسوبة فى خطاويكى
طيب يقولولنا انك تعبانة
اصلنا مش حانبطل نحبك لاجل تعبك
حتى لو طلعتى يا حاجة خربانة
ما انا عمرى ما حابقى فيكى شمتانة
ده انتى بلدى
بس محبتك فى دمى حيرانة
يا مصر
يا محروسة
يا ام الغلابة
باقولك اهوه وباشهّد الغلابة والديابة
حاتفضلى ساكتة على هوانك لأمتى؟
لحد ما تصبحى يا أم الدنيا خرابة؟؟؟؟؟

noreply@blogger.com (ظل الشمس) — Sat, 06 Oct 2007 21:31:00 +0000

عندما ننفخ فى كل القرب المقطوعة

كلاكيت 19 مرة

استيقظ مبكرا على صوت التلفاز
:وصوت نبيل الحلفاوى يدوى فى اذنى

"احسن وحوش..احسن وحوش"

بالطبع هو الطريق الى ايلات الذى استغرق من عمرى مرات ومرات فى مشاهدته طيلة عرضه فى التليفزيون
لا استطيع مشاهدته سوى فى مناسبات محددة
ربما عيد تحرير سيناء و6 اكتوبر وعيد العمال
لا لا عفوا....... عيد العمال اشاهد فيه الايدى الناعمة لارى محمود ذو الفقار وهو يتحدث عن حتى
واضح من هذه التصنيفات السينيمائية للمناسبات القومية اننى احب التخصصات !

ولكن السؤال الذى ظل يراودنى هنا:
هل كل ما يربطنى باكتوبر ومناسبته المجيدة هو الطريق الى ايلات والرصاصة لا تزال فى جيبى ؟
لا اعلم تماما ما كل هذا الغضب والحزن الذى يتملكنى وانا اكتب عن اكتوبر
فهى المرة الاولى التى اكتب فيها عن اكتوبر
لا لا
تعودت تحرى الصدق فى كتاباتى
ليست المرة الاولى
تذكرت الان
ففى كل عام يطلب منا معلم اللغة العربية ان نكتب موضوع انشاء عن نصر اكتوبر العظيم
وكنت امسك كراستى وقلمى واكتب اكليشيهات لا معنى لها ولا فائدة سوى ان تلك الحصة على حد تعبيرنا وقتها"حصة فاضية"
كنت مشهورة بين اساتذتى وزميلاتى اننى الافضل فى اللغة العربية والتعبير
وكم شهادات التقدير والمكافآت التى تلقيتها فى هذا المجال تشهد على هذه الشهرة التى وصلت لشهادة تقدير من جامعة الدول العربية فى مسابقة الخطابة والتحدث بالفصحى والتى عقدت على مستوى الوطن العربى
ولكنى الان
اكتب ما يعبر عنى لاقرأه أنا
وليس ليقرأه حكم المسابقة
اعترف
كنت اكتب مهاترات لم اقتنع بها يوما
كانت الصفات التى اصف بها جيشنا وشعبنا وقيادتنا من نسج خيالى
لم يكن عقلى مقتنعا
ليس لانها ليست حقيقية بل ببساطة لاننى لم اتلق برهانا واحدا او دليلا قاطعا على صدق ما اكتبه
لم اعاصر اكتوبر
لم اعاصر سوى تبعات اكتوبر
ايها السادة والسيدات اهيب بكم علما اننى لم اعاصر سوى نتائج كامب ديفد
ولم اشهد سوى السلام
جيلى يا حضرات المحترمين توقفت حدود رؤيته عند التطبيع
واتفاقيات تصدير الغاز ذات السعر الثابت
وصفقات الحديد المستخدم فى بناء الجادر العازل
والموقف المصرى الداعم للقضية الفلسطينية دائما
فهو فى كل انتفاضة
يشجب
ويندد
ويساند
ويدين
أما اكتوبر
نصر اكتوبر
حرب اكتوبر
فانا انتمى لجيل لا يربطه باكتوبر سوى صوت عبد الحليم مرددا "خلى السلاح صاحى"
جيل لا يعرف عن حب الوطن سوى شادية حينما تقول "يا حبيبتى يا مصر"
وربما فيلم مافيا تلك التجربة الفاشلة التى حاولت اقناع جيل باكمله ان هناك شىء ما يسمى انتماء قوى يستحق التضحية بالعمر ولكن لم تنتبه الفئة العمرية التى شاهدت الفيلم سوى لوسامة السقا وجمال منى وخفة دم احمد رزق
للاسف
نحن جيل مخلخل
كل احلامنا فى الخارج
كل طموحاتنا لا تتحقق الا بعد هبوطنا من الطائرة فى بلد اخر
اى بلد
حتى وان كان بلدا يحمل بين جنباته ظلما وقهرا وعنصرية اكبر واكثر
ولكنه فى نظرى جيلى الافضل
لانه ببساطة ليس مصر!
وها نحن نعيش ممزقين بين لغات وحضارات عديدة
اجيد الانجليزية والفرنسية واتطلع لتعلم الايطالية وانهائها فى وقت قياسى
كاتبى المفضل هو شكسبير وتشارلز ديكنز الانجليزى
يبهرنى بيل جيتس بعبقريته وهو الامريكى
اتحرق شوقا لزيارة اسبانيا فانا مبهورة بها وبحضارتها ذات الجذور العربية الاندلسية
تجذبنى اعمال جورج كلونى وراسل كرو وجوليا روبرتس وتوم هانكس وغيرهم
كم احب كلمات فرانك سيناترا والحانه حينما احن الى الكلاسيكيات
وان اردت سماع شيئا عربيا فلا اسمع سوى فيروز
نعم
فليس كاتبى المفضل احسان عبد القدوس او نجيب محفوظ
ولا يبهرنى ثراء ساويرس او عز
ولا اتحرق شوقا لزيارة اثار الفراعنة ولست مبهورة بهم
ولا يجذبنى عادل امام او نور الشريف او اى من هؤلاء
ولا احب كلمات ام كلثوم ولا الحانها
ولا اى شىء مصرى!
لقد اكتشفت اننى لا يربطنى بهذا البلد سوى بطاقتى
مكتوب بها فى خانة الجنسية:مصرية
وكنت اود لو اننى اضفت اليها كلمة واحدة
للاسف
لتصبح مصرية للاسف
ما الذى ادخلنى كل هذه المحاور واسلكنى كل تلك الدروب المظلمة؟
ولكن هل بالفعل جيل العولمة والانفتاح الحضارى سعيد بهويته اللا معروفة؟
هل انا سعيدة بهويتى التى لا اعرف لها اسما؟
ليس الظلم والفساد والمحسوبية والتخلف والجهل والديكتاتورية فقط الذين جعلوا من جيلى فاقدا لهويته ولانتماءه
بل انه انعدام الرؤية وفقدان الهدف لدينا
فلم تتم تربيتنا على تحديد كل شىء وتخطيطه قبل التورط فيه
بل اننا نأكل والسلام
وندرس والسلام
ونتزوج والسلام
ونعمل والسلام
وفى النهاية
نموت والسلام
لن يتذكرنا احد
ولن يكن لوجودنا تأثير كما لم يكن له اى هدف
ففقدان الهوية يتبعه فقدان للذكرى
وغياب الحلم بالتبيعة يتلوه غياب للتأثير
ربما نحب تلك الافلام التى تتحدث عن ايام العزة والكرامة لنأخذ جرعة ثقة بالنفس
اننا ننتمى لبلد على الاقل كان لاجدادنا فيه عز واباء وكبرياء
ايها الاخوة والاخوات
يشرفنى ان اخطركم علما اننى أنا التى سجلت تلك الاعترافات تعترف بشىء أهم من كل ما سبق
اعترف اننى انتمى لجيل "وانا مالى"
نعم
فهو جيل تربى على الانانية والغرور
مزق حلمه الكبير والذى كان يحمله اباؤنا واجدادنا معا جنبا الى جنب
مزقوا ذلك الحلم المشترك والهدف المشترك واعطوا كل منا نصيبه
فاصبح نصيب الولد شقة وعربية ولاب توب وموبايل وعروسة وواسطة يستطيع من خلالها ايجاد عمل
واصبح نصيب البنت من الحلم هو كل ما سبق باستئناء العروسة
وكل مسئول عن حلمه
وان كان تحقيقه يحتاج منك الى قتل اخيك فلا تتردد
حقق حلمك
فأنت بلا انتماء
ولا وفاء
ولا وطنية
ولا تحمل تقديرا لاى شىء سوى نفسك

هذه هى حكاية جيلى منذ ان ولد الى ان يموت
يعيش لنفسه ويموت لنفسه
يعيش نكرة ويموت نكرة
يعيش بلا هوية
ويموت بلا رحمة

noreply@blogger.com (ظل الشمس) — Tue, 25 Sep 2007 00:55:00 +0000

سيدى الرئيس :كيف تتناول فطورك؟

سؤال الح علىّ كثيرا بل فقد شارفت على الجنون لكثر انشغالى بالبحث عن اجابة لهذا السؤال

كلنا يخطىء طوال العام

بل واحيانا كثيرة نجور على بعضنا البعض

ولكن ماهو مدعاة للتفاؤل ان يأتى شهر رمضان وتتنزل الرحمات ويبحث فيه

العباد عن كل ما هو مكفر للذنوب وماحٍ للخطايا فيتصافى فيه الناس ,ويتخلص

فيه كل منا مما هو سبب فى ارقه وتعبه والزامه اكثر مما تحتمل نفسه من

ذنوب ومعاصى

ويستغل البعض فرصه حبس الشيطان - اعاذنا الله منه - احسن استغلال فيعطوا كل ذى حق حقه

ويردوا لكل صاحب مظلمة مظلمت

وهكذا يجلس المسلم (الحق)-بين قوسين اهه- يجلس المسلم الحق بعد يوم طويل من الصيام ويدعو ربه وهو مطمئن البال

انه قد استراحت نفسه تجاه من ظلمه او اعتدى على حق من حقوقه

والسؤال هنا:

كيف يجلس رئيسنا (الحبيب) لكى يتناول فطوره ؟

بأى (نفس)يتناول ما لذ وطاب ورعيته الذين سوف يُسأل عنهم يوم القيامة فى هذا العذاب والشقاء؟

كيف تسوّل له نفسه ان يظل قابعا على كرسيه الرئاسى وهناك اطفال ورجال ونساء لا يجدون ما يطرد عنهم جوع وعطش نهارهم ؟

وكيف يطمئن باله وتسكن روحه وهناك من يصومون ليلا ونهارا على مدار السنة وذلك لفاقتهم وحاجتهم الى المال

وكيف وكيف وكيف؟

اسئلة كثيرة

ولكن كل الذى يؤرقنى هو البحث عن سبب مقنع يجعل الامام الراعى المسئول عن رعيته امام ربه يوم القيامة يجلس ليتناول فطوره وسحوره وينام مرتاح البال بينما قرابة النصف من رعيته لا يجدون قوت يومهم

وسؤالى الاخير -والارزاق على الله-:

هى الناس دى اللى بيجرى فى عروقها دم؟

من اولها كده

noreply@blogger.com (ظل الشمس) — Wed, 14 Mar 2007 13:19:00 +0000

ايوة ظل الشمس

غريبة يعنى ولا غريبة؟

وعلى العموم لو مستغرب الاسم ومش عاجبك وحاتحسسنا انك بتتعامل مع ناس من كوكب بلوتو يا عم قولى الاول هو

ايه اللى فى دنيتنا دلوقتى مش غريب؟

قولى طيب .........................هو انت نفسك مش غريب؟؟؟

اضحك عليا بقى وقولى انا طبيعى ومش غريب وزيى زى اللى حواليا

اقولك ان بقا,.... ومين قالك ان اللى حواليك ناس عادية ومش غريبة

على العموم وعلى اى حال كل الرغى ده كان عشان محدش يستغرب اسم البيت بتاعى

ايوة ده بيتى ولو حانتكلم جد بقى ونكشر كده حانقول ان بمنتهى البساطة انا عملت بيتى فى ظل الشمس

يمكن لان الشمس اصلا من غير ظل ودايما عشان تنورنا بتحرقنا بنورها

بس انا بقى حبيت اختار بيتى فى مكان انا بحبه حتى لو مش موجود

الشمس اللى بظلها بتنور حتى لو كانت شمس من خيالى انا لوحدى

وظل الشمس اللى بيدفى حتى لو كان ظل شمس بتاعتى انا لوحدى

حاقول كل اللى عايزة اقوله من غير ما حد يدينى لا اوامر ولا نواهى ولا يقولى ايه صالح للنشر وايه اللى مش صالح للنشر

وسلامات يا مصر